शेयर बजारका लगानीकर्ताहरुले शेयर बजारले नयाँ उचाई कायम गरेसंगै बजारलाई स्थायित्व ल्याउने चुनौति रहेको बताएका छन् । साथै उनीहरुले कसैको लहलहैमा लागेर बिना अध्ययन बजार लगानी नगर्न पनि लगानीकर्ताहरू आग्रह गरेका छन् ।

नेपाल स्टक एक्सचेन्जले हालसम्मकै नयाँ उचाईका साथै कारोबार रकममा समेत रेकर्ड ब्रेक गरेको अवस्थामा लगानीकर्ताका विभिन्न पाँच संस्थाहरुले यसको स्वागत गर्दै लगानीकर्ताहरुलाई सचेत हुन समेत अनुरोध गरेका छन् ।

बिहीवार नेपालको शेयर बजारको इतिहासमा एकैदिन सबैभन्दा धेरै ७ अर्व ६१ करोड ३० लाख ३० हजार बराबरको शेयर किनबेच भएको थियो भने सोही दिन नेप्से सूचक हालसम्मकै उच्च १८९३.२४ विन्दुमा पुगेको छ।

साथै लगानीकर्ताका ५ संस्थाहरुले जारी गरेको विज्ञप्तिमा बढ्दो बजारमा लगानीकर्ताको उत्साहजनक प्रवेशलाई निरन्तरता दिनुपर्ने आवश्यकता औल्याइएको छ । उनीहरुले आम लगानिकर्ताहरूलाई आफुले लगानी गर्ने कम्पनीहरूको विगतको ईतिहास, संचालकहरूको सामाजिक हैसियत,कम्पनीद्वारा वितरित लाभांश इतिहास र भविष्यमा पाउने प्रतिफल जस्ता आधारभूत कुराहरूको गहन अध्ययन र विश्लेषण गरि उक्त कम्पनिको शेयरमा लगानी गर्न आग्रह समेत गरेका छन्।