म्यान्मारमा सैनिकहरूले जुन्ताविरोधी नागरिक मिलिसियासँग म्यान्डलेमा मंगलवार भिडन्त गरेका छन् । 

त्यसक्रममा चारजना विरोधकर्ता मिलिसिया मारिएका छन् भने सेनातर्फ कैयौं घाइते भएका छन् । 

फेब्रुअरी महिनामा कू गरिएपछि जनताले डिफेन्स फोर्सेस नामक समूह बनाएर सैनिक शासनको विरोध गरिरहेका छन् । तर यस्ता भिडन्त अहिलेसम्म ग्रामीण क्षेत्रमा सीमित थियो । 

गोप्य सूचना पाएपछि सुरक्षाबलहरू म्यान्डलेस्थित चान म्या थार्सी नामक नगरमा रहेको एक घरमा छापा मार्न पुगेका थिए । त्यहाँ उनीहरूमाथि साना हतियार र ग्रिनेडले प्रहार गरिएको जुन्ताको सूचना टोलीले बयान जारी गरेर जानकारी दियो । 

त्यसपछि भएको भिडन्तमा सुरक्षाकर्मीहरू गम्भीर घाइते भएको र चारजना आतंकवादी मारिएको अनि आठजनालाई पक्राउ गरिएको पनि बयानमा उल्लेख छ । 

आङ सान सू ची सरकारलाई अपदस्थ गरी सेनाले गरेको कूका विरुद्ध जनस्तरमा विरोध कायम छ । त्यसमाथि गरिएको दमनका कारण ८७० भन्दा बढी नागरिकले ज्यान गुमाइसकेका छन् । 

स्थानीय आत्मरक्षा बलहरूको उदय भएपछि कूको विरोध गर्ने सयौं मानिस सैन्य तालिम लिनका लागि विद्रोहीहरू भएको इलाकातर्फ गएको विश्लेषकहरू बताउँछन् ।