अफगानिस्तानमा अमेरिकाले बहिर्गमन गर्दै गर्दा ड्रोन आक्रमण गरेकोमा अमेरिकी सञ्चारमाध्यमले त्यस विषयमा प्रश्न उठाएका छन् । 

न्युयोर्क टाइम्स र वाशिङटन पोस्टले दाबी गरेअनुसार, उक्त ड्रोन आक्रमणमा इस्लामिक स्टेटका लडाकू मारिएको खबर झूटो हो । 

काबुलमा गरिएको उक्त आक्रमणमा अमेरिकाको सहायक समूहका मानिसको मृत्यु भएको थियो । प्राप्त प्रमाणहरूका आधारमा उनीहरूले अमेरिकी सेनाको दाबी पनि खारेज गरेका छन् । सेनाले गाडीमा विस्फोटक पदार्थ भएका दोस्रो विस्फोट भएको दाबी गरेको थियो । 

तर पेन्टागनले ठूलो जोखिमलाई उक्त आक्रमणमार्फत टारेको बताएको छ । 

काबुलमा अगस्ट २९ मा गरिएको आक्रमणमा एकै परिवारका १० जनाको मृत्यु भएको थियो । परिवारका अन्य सदस्यका अनुसार, मर्नेहरूमा ६ जना बालबालिका थिए । 

अमेरिकी सेना त्यतिखेर उच्च सतर्क स्थितिमा थियो किनकि त्यसको तीन दिनअघि एक आत्मघाती आक्रमणकारीले काबुल विमानस्थलमा आक्रमण गरेर १०० भन्दा बढी नागरिक र १३ अमेरिकी सैनिकको हत्या गरेको थियो । 

दुवै पत्रिकाले प्रमाणका लागि भिडियो र तस्वीरहरू भेला पारेका थिए र प्रत्यक्षदर्शीहरूसँग यस विषयमा कुराकानी गरेका थिए । त्यसपछि उनीहरूले गाडीमा कुनै विस्फोटक पदार्थ नभएको निष्कर्ष निकालेका हुन् । 

अमेरिकी सेनाले चाहिँ मारिएका व्यक्तिको पहिचान आक्रमणअघि नखुलेको तर इस्लामिक स्टेटको अफगानिस्तान शाखासँग ऊ जोडिएको बताएको छ । 

जोइन्ट चीफ्स अफ स्टाफका अध्यक्ष मार्क मिलेले यो सही आक्रमण भएको बताए । 

न्युयोर्क टाइम्स र वाशिङटन पोस्टले मारिने व्यक्ति ४३ वर्षका इजमराई अहमदी भएको लेखे । उनी क्यालिफोर्नियाको न्युट्रिसन यान्ड एजुकेसन इन्टरनेसनल नामक सहायता समूहसँग जोडिएका थिए । अहमदीले अमेरिका जानका लागि निवेदन दिएका थिए । 

न्युयोर्क टाइम्सका अनुसार, अमेरिका सेनाले निगरानी गरिरहेको सेतो सेडान गाडी आईएसको सेफ हाउसबाट निस्केको थियो । आफूहरूले आतंकवादीहरूको कुराकानीलाई इन्टरसेप्ट गरेको अमेरिकी सेनाले बतायो । गाडी कतिपय स्थानमा रोकिएको थियो किनकि उसलाई सामान उठाएर डेलिभरी गर्नु थियो । 

गाडीमा भएको प्याकेट निकै ठूलो हुनाले अमेरिकी सेनाले त्यो विस्फोटक पदार्थ भएको अनुमान गरेको थियो । 

पत्रिकाहरूले सुरक्षासँग सम्बन्धित भिडियो जाँच गर्दा अहमदीले ल्यापटप र पानीका ठूला भाँडा बोकेको पाए । काबुलमा पानीको अभाव भएकाले उनले भाँडा बोकेका थिए । 

पछि अहमदी घर गए । अमेरिकाका ड्रोन सञ्चालकहरूले उनलाई अर्का एक पुरुषसँग कुराकानी गरेको देखेपछि आक्रमण गर्ने निर्णय लिए । तर अहमदीमाथि आक्रमण हुँदा उनको परिवारका मानिस वरपर नै थिए । मर्ने सबभन्दा सानो बालकको उमेर दुई वर्ष थियो ।