नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले अध्यक्ष माधवकुमार नेपाल नेतृत्वको नेकपा एकीकृत समाजवादी पार्टीसँग सहकार्य गर्न काभ्रेका स्थानीय नेतालाई निर्देशन दिएका छन् ।

काभ्रेको पाँचखालमा आयोजित योङ कम्युनिस्ट लिग (वाइसीएल) नेपालको दोस्रो पाँचखाल नगर सम्मेलनलाई सम्बोधन गर्दै प्रचण्डले सहज ढंगले सहकार्य गर्न निर्देशन दिए ।

अध्यक्ष प्रचण्डले भने, ‘माधवजी, झलनाथजीको अर्को पार्टी बनेको छ । त्यो पार्टी बनाउनमा हाम्रो कम मेहनत छैन । तपाईंहरू पनि ती साथीहरूसँग सहज ढंगले सहकार्य बढाउनुहोला ।’

एमालेमै रहेका तेस्रो धारका नेताहरूबारे बताउँदै प्रचण्डले ती नेताहरू धेरै दिन एमालेमा नटिक्ने दाबी गरे । उनले भने, ‘बडो दया लाग्छ ती साथीहरूलाई देख्दा, ढिलोछिटो त्यहाँबाट निस्किन्छन् । त्यहाँ बस्ने ठाउँ छैन ।’

उनले डा. बाबुराम भट्टराई, मोहन वैद्य, विप्लव र मोहनविक्रम सिंहको पार्टीसँग सहकार्य गर्न स्थानीय नेताहरूलाई निर्देशन दिएका छन् । प्रचण्डले भने, ‘किरणजी, विप्लवजी, मोहनविक्रम सिंह, बाबुरामजीको पार्टीसँग हार्दिकतापूर्वक अन्तर्क्रिया बढाएर लैजानुहोला । हामीले केन्द्रमा बढाइरहेका छौं ।’