नेकपा एमालेका नेताहरूले जारी १०औं राष्ट्रिय महाधिवेशन भोलि आइतवार सहमतिमा नेतृत्व चयन गर्दै समापन हुँदै बताउन थालेका छन् ।

चितवनको सौराहमा महाधिवेशनको बन्दसत्र चलिरहेका बेला नेताहरूले सहमति हुने सन्देश सञ्चार गरिरहेका छन् ।

एमाले केन्द्रीय कार्यालयका सचिव शेरबहादुर तामाङले महाधिवेशन सम्पूर्ण रूपमा सहमतिमा भोलि आइतवार समापन हुने दाबी गरे ।

उनले भने, ‘महाधिवेशन तोकिएकै मितिमा सम्पन्न हुन्छ । महाधिवेशन सम्पूर्ण रूपमा सहमतिमा भोलि १२ गते समापन हुन्छ ।’

कार्यालय सचिव तामाङले नेतृत्व चयनमा हुनसक्ने सहमतिको खाकाबारे भने केही बताएनन् ।

नेकपा एमालेभित्र अध्यक्ष, वरिष्ठ उपाध्यक्ष र महासचिव पदमा सहमति मिलाउन सकस परिरहेको छ । अध्यक्षमा ओलीसँगै भीम रावलले समेत प्रचारप्रसार शुरू गरिसकेका छन् ।