निकारागुआले ताइवानसँग सम्बन्ध तोडेपछि अमेरिका हिस्स

निकारागुआ सरकारले ताइवानसँगको सम्बन्ध औपचारिक रूपमा अन्त्य गर्दै संसारमा एक मात्र चीन भएको अनि ताइवान चीनकै भूभाग भएको घोषणा गरेको छ । 

उक्त देशका परराष्ट्रमन्त्री डेनिस मोनकाडा कोलिन्द्रेसले बिहीवार बयान जारी गरेर ताइवानसँग कूटनीति सम्बन्ध तोडेको जानकारी दिए । 

ताइवानको परराष्ट्र मन्त्रालयले यस खबरप्रति पीडा र पश्चात्ताप अनुभव गरिरहेको बताएको छ । आफूसँग संसारभरि कूटनीतिक सम्बन्ध कायम गर्ने अधिकार रहेको पनि उसले तर्क गरेको छ । 

अब संसारमा १४ वटा सार्वभौम मुलुकले मात्र ताइवानसँग कूटनीतिक सम्बन्ध राखेका छन् । ती सबै साना र अल्पविकसित मुलुक हुन् ।

हालैका दशकमा सयौं देशले ताइवानसँग सम्बन्ध तोडेर जनगणतन्त्र चीनसँग कूटनीतिक सम्बन्ध गाँसेका छन् । 

अमेरिकाले चीनविरोधी गठबन्धन तयार पार्नका लागि लोकतन्त्र सम्मेलनको आयोजना गरेकै दिन निकारागुआले चीनसँग सम्बन्ध गाँसेपछि अमेरिका हिस्स परेको छ ।