सहकर्मीलाई लागु औषध राखेर फसाउन खोजेको आरोप लागेका पत्रकार महासंघ, रौतहट शाखाका तत्कालिन सहसचिव सञ्जय सहनीलाई जिल्ला अदालतले कारागार चलान गर्ने आदेश दिएको छ। 

घटनापछि फरार रहेका सहनी केही समय अघि अदालतमा आफै उपस्थित भएका थिए।

लागु औषध र आपराधिक षडयन्त्रको आरोप लागेका सहनी पुर्पक्षका लागि कारागार चलानको आदेशपछि हाल जेलमा रहेका छन्। रौतहट प्रहरी प्रमुख विनोद घिमिरेले सहनी आफै अदालतमा उपस्थित भएको र हाल कारागारमा रहेको बताए। 

त्यसअघि पक्राउ परेका चार जनासँग अदालतले १०/१० लाख रुपैयाँ धरौटी मागेको थियो।

पत्रकार सहनीको योजना तथा  प्रहरी जवान उदयप्रसाद यादब र असई मनोज शाहको उपस्थितीमा धिरज यादब र जितेशकुमार यादबले पत्रकार मोहम्मद मोजिबुल्लाहको मोटरसाइकलमा लागु औषध राखेर उनलाई फसाउन खोजेको आरोप लागेको थियो। 

प्रहरीले सुरुमा लागु औषधसहित पत्रकार मोजिबुल्लाह पक्राउ भनेर बाहिर ल्याएपनि सिसिटिभी फुटेजका आधारमा प्रहरीद्धय उदय र मनोजको उपस्थितीमा धिरज र जितेशले मोजिबुल्लाहको मोटरसाइकलमा लागु औषध राखेको पाइएको थियो। 

मोजिबुल्लाह रौतहट एक्सप्रेसका सन्चालक हुन्। सहनीले प्रहरीलाई समेत प्रयोग गरेर निर्दोषलाई फसाउन खोजेको आरोप लागेको थियो।

यही विवादमा मुछिएका तत्कालिन रौतहट प्रहरी प्रमुख सिद्धिविक्रम शाहलाई प्रहरी प्रधान कार्यालय तानिएको थियो। सहनीले एसपी शाहसँगको मोबाइल कुराकानीको अडियो सार्वजनिक गरेका पनि थिए। शाहले आफ्नो कुनै गलत नियत रहेको बताएका थिए।