सत्ता साझेदार नेकपा एकीकृत समाजवादीका अध्यक्ष माधवकुमार नेपालले स्थानीय तहको चुनाव संविधान र कानूनअनुरूप हुनुपर्ने बताएका छन् ।

बुधवार पार्टी कार्यालय शान्तिनगरमा विभिन्न पार्टीबाट आएका कार्यकर्तालाई पार्टी प्रवेश गराउँदै अध्यक्ष नेपालले स्थानीय तह, प्रदेशसभा र प्रतिनिधि सभाको निर्वाचन संविधानलाई सर्वोपरि राखेर सम्पन्न गर्नुपर्ने बताए ।

उनले सत्तारुढ दलहरूबीच एकैपटक ३ तहको निर्वाचन गराउन सके खर्च कम लाग्ने भएकाले विज्ञहरूसँग विस्तृत छलफल गरिरहेको बताए । अध्यक्ष नेपालले बुधवार भइरहेको राष्ट्रिय सभाको निर्वाचनमा १९ सीट नै सत्तारुढ गठबन्धनले जित्ने दाबी समेत गरे ।

अध्यक्ष नेपालले भने, ‘राष्ट्रिय राजनीतिमा हाम्रो दलको राजनीतिले तरंग पैदा गरिरहेको छ । अहिले हामी ५ दलीय गठबन्धनमा छौं । ५ दलीय गठबन्धनका सबै दलहरू मिलेर राष्ट्रिय सभाको चुनावमा हामीले १९ जना उम्मेदवार खडा गरेका छौं । आजबाट खाली रहेका राष्ट्रियसभा सदस्यहरूको १९ सीटका लागि ९ बजेबाट मतदान शुरू भइसकेको छ । ३ बजेसम्म मतदान हुनेछ । र सातै वटा प्रदेशमा हुने चुनावमा हाम्रो पार्टीबाट ५ जनालाई उम्मेदवारी दिएका छौं । माओवादी ५ जना, कांग्रेस ६ जना, राष्ट्रिय जनमोर्चा १ र जनता समाजवादीको २ जना गरी यसरी हामीले उम्मेदवार तयार गरेका छौं । ती उम्मेदवारहरूको आज फैसला पनि हुनेछ । हामीलाई आशा छ । १९ वटा स्थानमा हामी नै हामी विजयी हुनेछौं । त्यो परिणामले पनि तरंग पैदा गर्नेछ । तपाईंहरू सुनिरहनुभएको छ कि स्थानीय तहको चुनाव कहिले गर्ने, संघीय चुनाव कहिले गर्ने ? प्रदेश सभाको चुनाव कहिले गर्ने ? यसबारेमा व्यापक बहस भइरहेको छ । यो बहसको सन्दर्भमा हाम्रो धारणा संविधानलाई सर्वोपरि राखेर, कानून अनुरूप नै चुनाव सम्पन्न हुनुपर्छ । यसो गर्दा एकै पटकमा ३ वटै तहको निर्वाचन गर्न सकियो भने राम्रो हुन्छ । किनभने एउटा चुनाव गराउँदा झण्डै ५ अर्ब रुपैयाँ खर्च हुन्छ । योभन्दा पहिला ५ चरणमा चुनाव भएको थियो । त्यसमा झण्डै २५ अर्ब रुपैयाँ खर्च भएको थियो । यदि एकै चरणमा गर्ने हो भने ५–१० अर्बमा चुनाव सकिन्छ । उम्मेदवारको पनि खर्च कम हुन्छ । त्यसका निम्ति हामी छलफल चलाइरहेका छौं ।’

अध्यक्ष नेपालले राष्ट्रिय सभाको १९ सीटको जीतले अन्य तहको चुनावमा पनि तरंग पैदा गर्ने बताए ।