नेकपा एमालेका उपमहासचिव प्रदीप ज्ञवालीले वर्तमान सरकार ‘छालाका जुत्ता पानी देखेर डराए’जस्तै निर्वाचनबाट भागेको दाबी गरेका छन् । 

प्रेस चौतारी नेपाल रूपन्देहीले आइतवार बुटवलमा आयोजना गरेको पत्रकार सम्मेलनमा ज्ञवालीले सरकारले स्थानीय तहको चुनाव छल्न अनेक बहाना गरिरहेको आरोप लगाएका हुन् । 

‘गठबन्धनप्रति एमालेलाई कुनै टाउको दुखाइ छैन,’  उनले भने, ‘छालाका जुत्ता पानीबाट भागेजस्तै कांग्रेस र माओवादीसहितको गठबन्धन सरकार पानीसँग छालाका जुत्ता डराएजस्तो चुनावसँग डराएको छ । जहिले भए पनि एमाले चुनाव फेस गर्न तयार छ ।’ 

स्थानीय तहको निर्वाचन समयमै हुनुपर्ने भन्दै उनले स्थानीय तहलाई एक दिन पनि खाली गराउने छुट सरकारलाई नभएको बताए । ‘मुलुकको निकास ताजा जनादेशबाट हुन्छ, समयमा स्थानीय तहको चुनाव हुनुपर्छ,’ उनले भने ।  

शेरबहादुर देउवा सरकारले नेपालको इतिहासले कहिल्यै नभोगेको अस्तव्यस्त सिर्जना गराएको आरोप पनि लगाए । उनले कार्यपालिका, न्यायपालिका र व्यवस्थापिका गिजोल्दा देशको लोकतन्त्र नै धर्मराएको दाबी गरे । 

पूर्व मन्त्री समेत रहेका नेता ज्ञवालीले वर्तमान देशको अवस्था आन्तरिक र बाह्य हिसाबले चुनौतीपूर्ण देखिएको बताए । 

संविधानले स्थानीय तह एक दिन पनि रिक्त नहुने व्यवस्था भए पनि त्यसलाई छलेर खाली गर्न अनेक बहाना रचिरहेको उनको आरोप छ । 

‘बिना कुनै चलखेल छिटो चुनावको मिति घोषणा देउवाले नगरे फेरि उनलाई कलंकको टीका लगाउने छन्, कुनै पनि बहानामा स्थानीय चुनाव रोक्ने पाइँदैन,’ ज्ञवालीले भने । 

एमालेले एमसीसीप्रति उपयुक्त समयमा आफ्नो धारणा दिने पनि बताए । 

‘सभामुखले संसदको ढोका बन्द गरेका छन्, एमसीसीप्रति सभामुखको धारणा विवादास्पद छ,’ उनले भने, ‘प्रक्रियामा अल्झिएकोले एमालेले आफ्नो धारणा नल्याएको हो ।’