मिलेनियम च्यालेन्ज कर्पोरेसन (एमसीसी) सँग गरिएको सम्झौताको फोटोकपी नआउँदा जनता समाजवादी पार्टी (जसपा) नेपालको कार्यकारिणी समितिको बैठक औपचारिक रूपमा शुरू हुन सकेको छैन । 

बिहान ११ बजेदेखि बैठक बस्ने भएपछि सबै कार्यकारिणी सदस्यहरू बैठकस्थलमा पुगेका थिए । तर, हालसम्म बैठक औपचारिक शुरुआत हुन नसकेको एक कार्यकारिणी सदस्यले बताए ।

‘अहिलेसम्म त्यसै अनौपचारिक कुरा मात्र भइरहेको छ, एमसीसीसँग गरिएको सम्झौताको डकुमेन्टको फोटोकपी गर्न गएकै लामो समय भइसक्यो,’ ती सदस्यले भने,‘उक्त सम्झौताको फोटोकपी आएर सबै सदस्यलाई वितरण हुने तथा त्यसको वाचन भएपछि मात्र उक्त विषयमा औपचारिक धारणा राख्ने क्रम शुरू हुन्छ ।’

बैठकअघि नै ती सबै तयारी हुनुपर्नेमा नभएका कारण बैठक अबेर साँझसम्म लम्बिने उनको भनाइ छ ।