चिनियाँ परराष्ट्र मन्त्री वाङ यी तीन दिने नेपाल भ्रमणका लागि शुक्रवार काठमाडौं आइपुगेका छन् । दक्षिण एसियाका ४ मुलुकको भ्रमणमा रहेका वाङ भारतको नयाँ दिल्ली हुँदै भर्खरै त्रिभुवन अन्तर्राष्ट्रिय विमानस्थलमा अवतरण गरेका हुन् । 
अमेरिकी सहयोग परियोजना एमसीसी पारित भएपछि चीनका तर्फबाट भएको उच्चस्तरीय भ्रमणलाई महत्त्वका साथ हेरिएको छ । चिनियाँ राष्ट्रपति सी चिनफिङसँग अत्यन्तै निकट मानिने यी चीनका स्टेट काउन्सिलर समेत हुन् ।
नेपालमा रहँदा उनले राष्ट्रपति विद्यादेवी भण्डारी, प्रधानमन्त्री शेरबहादुर देउवा, पूर्व प्रधानमन्त्रीद्वय केपी शर्मा ओली र पुष्पकमल दाहाल प्रचण्ड तथा समकक्षी नारायण खड्कासँग भेट्ने तय भएको छ ।
०००००
नेपाल प्रहरीमा तल्लो तहका प्रहरीको लामो समयसम्म बढुवा हुन नसक्ने समस्या समाधान गर्न नयाँ सिर्जना गरिएका पदमा बढुवा प्रक्रिया सुरु भएको छ । नेपाल प्रहरी स्थापना भएदेखि नै तल्लो तहमा लामो समयसम्म बढुवा हुन नसक्ने समस्या समाधान गर्न तीन पद सिर्जना गरिएको थियो । प्रहरी नियमावली, २०७१ लाई नवौँ संशोधन गरी जवान र हबल्दारको बीचमा प्रहरी सहायक हबल्दार, हबल्दार र प्रहरी सहायक निरीक्षकको बीचमा प्रहरी वरिष्ठ हबल्दार तथा प्रहरी निरीक्षक र प्रहरी नायब निरीक्षकको बीचमा प्रहरी वरिष्ठ नायब निरीक्षक पद सिर्जना गरिएको छ । 
गृह मन्त्रालयका प्रहरी प्रशासन शाखाका उपसचिव गणेश गैह्रेका अनुसार नियमावली संशोधनपछि तीन पदमा गरेर २० हजार ४१९ प्रहरीको बढुवा हुनेछ । उहाँका अनुसार प्रहरी वरिष्ठ नायब निरीक्षकमा एक हजार ४१८, प्रहरी वरिष्ठ हबल्दारमा तीन हजार ७४८ र प्रहरी सहायक हबल्दारमा १५ हजार २५३ जना बढुवा हुनेछन् ।  यीमध्ये पहिलो चरणमा प्रहरी वरिष्ठ नायब निरीक्षकमा १९१, प्रहरी वरिष्ठ हबल्दारमा एक हजार १७३ तथा प्रहरी सहायक हबल्दारमा एक हजार ७५२ जना बढुवा सिफारिस भएका छन् ।
००००
प्रधानमन्त्री शेरबहादुर देउवाले बहुक्षेत्रीय प्राविधिक तथा आर्थिक सहयोगका लागि बङ्गाल खाडीको प्रयास (बिम्स्टेक) को पाँचौँ शिखर सम्मेलनलाई यही चैत १६ गते श्रव्यदृश्यका माध्यमबाट सम्बोधन गर्ने भएका छन् । 
प्रधानमन्त्री देउवा नेतृत्वको नेपाली प्रतिनिधिमण्डलमा परराष्ट्रमन्त्री डा नारायण खड्का, प्रधानमन्त्रीका प्रमुख स्वकीय सचिव भानबहादुर देउवा, मुख्यसचिव शङ्करदास वैरागी, परराष्ट्र सचिव भरतराज पौड्याल, प्रधानमन्त्री तथा मन्त्रिपरिषद्को कार्यालय र परराष्ट्र मन्त्रालयका वरिष्ठ अधिकारी सहभागी  हुने  परराष्ट्र मन्त्रालयले जनाएको छ ।
००००
अमेरिकी सरकारले कोभ्याक्स सुविधा अन्तरगत शुक्रबार नेपाललाई थप खोप उपलब्ध गराएको छ । अमेरिकाले नेपाललाई थप ७ लाख ६६ हजार ३५० डोज  कोभिड१९ विरुद्धको फाइजर खोप हस्तान्तरण गरेको हो ।
००००
नेकपा एमालेका उपमहासचिव पृथ्वीसुब्बा गुरुङले स्थानीय तहको निर्वाचनमा एमालेले बहुमत हासिल गर्ने दाबी गरेका छन् । एमाले तनहुँ जिल्ला कमिटीले आज बेलचौतारामा आयोजना गरेको घोषणासभामा उनले स्थानीय तहको निर्वाचनमा एमालेको जितलाई कसैले रोक्न नसक्ने जिकीर गरे ।
००००
सानेपामा शुक्रवारबाट शुरू भएको कांग्रेस केन्द्रीय समितिको बैठक आइतवार बस्ने गरेर स्थगित भएको छ ।
विकसित पछिल्लो राजनीतिक घटनाक्रमको समीक्षा र पार्टीको भावी रणनीति बनाउन कांग्रेसको बैठक बसेको हो । अब आइतवार दिउँसो १ बजे बैठक बस्नेछ । शुक्रवारको बैठकमा २० केन्द्रीय प्रतिनिधि, सुदूरपश्चिमबाहेक ६ प्रदेशका सभापति, गण्डकी प्रदेशका मुख्यमन्त्रीलगायतले धारणा राखेका थिए । बैठकपछि पार्टी प्रवक्ता प्रकाशशरण महतले प्रदेशका सभापतिले पार्टी अवस्थाबारे रिपोर्टिङ गरेको बताए ।
सो क्रममा कहीँ तालमेल गर्नुपर्ने र कतै एक्लै लड्नुपर्ने धारणा आएको उनको भनाइ छ ।
००००
राप्रपा नेपालका अध्यक्ष कमल थापाले धर्मनिरपेक्षता वा हिन्दुराष्ट्र भन्नेबारे जनमत संग्रह गर्न आह्वान गरेका छन् । शुक्रवार राष्ट्रिय सनातन धर्म संस्कृति महासंघको घोषणासभा मार्फत सबै राजनीतिक दलहरुलाई उनले यस्तो आह्वान गरेका हुन् ।
००००
बालिका बलात्कारको अभियोग लागेका अभिनेता पल शाह तनहुँ जिल्ला अदालतको आदेशविरुद्ध उच्च अदालत जाने भएका छन् । 
तनहुँ अदालतले बिहीवार पललाई पुर्पक्षका लागि कारागार पठाउन आदेश दिएको थियो । 
पलका वकिलहरूले आइतवार उच्च अदालत पोखरामा पुनरावेदन गर्ने तयारी गरेका छन् । पललाई धरौटीमा छाडेर अनुसन्धान गर्नुपर्ने माग गर्दै पलका वकिलहरू उच्च अदालत जाने तयारी गरिरहेका हुन् । 
पीडितको बयान बाझिएको विषयलाई आधार बनाएर पुनरावेदन गर्ने पलका वकिलहरूको भनाइ छ ।
००००
नेपाल पपुवा न्युगिनीसँग पहिलो एकदिवसीय खेलमा ६ रनले पराजित भएको छ । त्रिवि क्रिकेट मैदानमा पीएनजीले दिएको २९३ रनको लक्ष्य पछ्याएको नेपालले निर्धारित ५० ओभरमा ८ विकेट गुमाएर २८६ रन बनाएसँगै पराजित बनेको हो ।
००००
पछिल्लो २४ घण्टामा १८ जनामा कोरोना संक्रमण पुष्टि भएको छ । ४३४२ जनामा गरिएको नमूना परीक्षणमा १८ जनामा संक्रमण पुष्टि भएको हो । स्वास्थ्य तथा जनसंख्या मन्त्रालयका अनुसार सो समयावधिमा २७१ जना निको भएर अस्पतालबाट डिस्चार्ज भएका छन् ।