भरतपुर महानगरपालिका प्रमुखको उम्मेदवारमा विजय सुवेदीको नाम सर्वसम्मत सिफारिश भएको छ ।

महानगर कमिटीको आइतवार बसेको बैठकले पार्टीका बागमती प्रदेश कमिटी सचिव सुवेदीको नाम सर्वसम्मत रूपमा जिल्ला कमिटीसमक्ष सिफारिश गर्ने निर्णय गरेको एमाले चितवनका अध्यक्ष रामप्रसाद न्यौपानेले लोकान्तरलाई जानकारी दिए ।

बैठकमा पार्टीका पोलिटब्युरो सदस्य एवं अघिल्लो चुनावमा भरतपुर महानगरपालिका प्रमुखको उम्मेदवार देवी ज्ञवालीले नै सुवेदीको नाम प्रस्ताव गरेका थिए भने प्रतिनिधि सभा समेत रहेका पूर्व जिल्ला अध्यक्ष कृष्णभक्त पोखरेलले समर्थन गरेका थिए । 

चितवन २ (ख)बाट निर्वाचित प्रदेश सभा सदस्य सुवेदी अष्टलक्ष्मी शाक्य नेतृत्वको सरकारमा झण्डै २ महिनाका लागि बागमती प्रदेश सरकारको सामाजिक विकास मन्त्री बनेका थिए ।

जनतामा लोकप्रिय छवि भएका सुवेदीले चितवनमा तीन कार्यकाल पार्टीको नेतृत्व गरिसकेका छन् ।

भरतपुर महानगरको उपप्रमुखको नाममा भने छलफल भइरहेको अध्यक्ष न्यौपानेले बताए ।

भरतपुरको मेयरको उम्मेदवार बनाउने विषयमा विषयमा सत्ता गठबन्धनमा भने खिचातानी छ ।

हाल महानगरको नेतृत्व गरिरहेको माओवादी केन्द्रले रेनु दाहाललाई नै दोहोर्‍याउन खोजे पनि कांग्रेसले कुनै हालतमा मेयर नछाड्ने बताउँदै आएको छ ।

गठबन्धनमा खिचातानी रहेकाले बेला एमाले सर्वसम्मत उम्मेदवार सिफारिश गरेर चुनावी दौडमा होमिएको छ ।

महानगर प्रमुखको उम्मेदवार महानगरको प्रस्ताव तथा जिल्ला र प्रदेशको सिफारिशमा केन्द्रले चयन गर्ने एमालेको आन्तरिक कार्यविधि छ ।