नेपाली कांग्रेसका महामन्त्री गगन थापाले नेकपा एमालेका अध्यक्ष केपी शर्मा ओलीले बिहीवार प्रतिनिधि सभामा गरेको तीन घण्टा लामो सम्वोधनलाई गन्थनको संज्ञा दिएका छन् । ओली रन्थनिएको बेला उनको कुण्ठा आफूहरुले सुनिदिनु पर्ने थापाले टिप्पणी गरे । 

प्रतिनिधि सभामा शनिवार सरकारका वार्षिक नीति तथा कार्यक्रम माथिको छलफलको शुरुमा महामन्त्री थापाले ओलीले व्यक्ति गरेको कुण्ठाको कुनै जवाफ नहुने बताएका हुन् । 

‘नीति तथा कार्यक्रम माथिको छलफलको प्रारम्भमै करिब घण्टौँ गन्थन भइसकेपछि मलाइ साथीहरुले भन्नुभयो, यो गन्थनको उत्तर दिनुपर्छ । मैले साथीहरुलाई भने– प्रश्नको उत्तर हुन्छ, विचारमा टिप्पणी हुन्छ, प्रतिक्रियामा सहमति व्यक्त, असहमति हुन सक्छ । तर कुण्ठामा केही हुँदैन सहानुभूति मात्र प्रकट हुन्छ’ थापाले संसदमा भने, ‘साथीहरुले भन्नुभयो बसेर घण्टौँ बोल्ने ? मैले भने रन्थनिएको बेलामा बसेर, उठेर, सुतेर जसरी बोलेपनि हुन्छ । पलेँटी कसेर बोलेपनि हुन्छ, एक खुट्टाले उभिएर बोलेपनि हुन्छ अहिले हामीले सुनिदिनु पर्छ । कहाँ बोल्ने के बोल्ने भन्ने कुरा बोल्नेले हेक्का राख्ने हो । हामीले विचरा भन्न सक्छौ यतिमात्र हो ।’

महामन्त्री थापाले एमाले अध्यक्ष ओलीले निर्वाचन हुँदैन भनेर भनेपनि सानदार ढंगले सफल भएको बताए । बिहीवार प्रतिनिधि सभा बैठकमा ३ घण्टा सम्वोधन गर्दै ओलीले निर्वाचनको निष्पक्षतामा प्रश्न गरेका थिए ।