लोकतान्त्रिक समाजवादी पार्टी (लोसपा)लाई सरकारमा ल्याउन प्रधानमन्त्रीले २ मन्त्रालय छाड्न आग्रह गरेपछि जनता समाजवादी पार्टी (जसपा) नेपालले सरकार छाड्ने तयारी शुरू गरेको छ ।

जसपा अध्यक्ष उपेन्द्र यादवले यसबारे पार्टीका नेताहरूसँग छलफल गरेका छन् । 

आइतवार साँझ प्रधानमन्त्री शेरबहादुर देउवासँग बालुवाटारमा भएको छलफलमा उपेन्द्रले २ मन्त्री लिएर सरकारमा नबस्ने बताएका थिए ।

‘२ जनालाई फिर्ता गर्न सम्भव छैन, बरु सरकारबाटै बाहिरिन तयार छौं,’ उपेन्द्रको भनाइ उदृत गर्दै एक सांसदले लोकान्तरसँग भने । 

शनिवार प्रधानमन्त्री देउवाले लोसपा अध्यक्ष महन्थ ठाकुरसँग भेटेर २ मन्त्रालयसहित सरकारमा सहभागी हुन प्रस्ताव गरेका थिए । देउवाले २ मन्त्रालय र प्रतिनिधि सभाको उपसभामुख पद लिन आग्रह गरेका थिए ।

लोसपाका नेताहरूसँग देउवाले मंगलवार फेरि छलफल गर्ने बताएका छन् । 

आफ्नो भागमा रहेका २ मन्त्रालय खोसेर लोसपालाई सरकारमा सहभागी गराउने तयारी भए पनि जसपा सशंकित भएको छ । ‘हाम्रो अध्यक्षले एमाले अध्यक्ष केपी शर्मा ओलीसँग भेटेको विषयलाई लिएर धेरै आशंका गरियो, महन्थजीलाई साथ लिन खोजेको भए हामीहरू सरकार छाड्न तयार छौं,’ ती सांसदले भने ।

गठबन्धनमा इमान्दारीपूर्वक तालमेल नभएकाले यसको पनि समीक्षा गर्नुपर्ने आवाज पार्टीभित्र उठिरहेको जसपाका एक प्रभावशाली नेताले बताए । 

नेकपा एसले सरकारमा सहभागी मन्त्री हेरफेरको गृहकार्य गरेपछि जसपाभित्र पनि मन्त्री फेर्न दबाब बढेको थियो । जसपाले लिएका ४ मन्त्रालयमध्ये २ छाड्न भनेपछि उपेन्द्र अप्ठ्यारोमा परेका छन् । 

जसपाको तर्फबाट कृषिमन्त्रीमा महेन्द्र यादव, भौतिक पूर्वाधारमा रेणु यादव, वन मन्त्रालयमा रामशहायप्रसाद यादव र संघीय मामिला तथा सामान्य प्रशासनमा राजेन्द्र श्रेष्ठ मन्त्री छन् । 

यसैबीच, पार्टीभित्र डा. बाबुराम भट्टराईसँग विवाद बढेसँगै उपेन्द्रले महन्थ ठाकुरको लोसपासँग पार्टी एकताको पहल शुरू गरेका छन् । लोकान्तरसँग कुरा गर्दै यादवले एकताका लागि ढोका खुलै रहेको प्रतिक्रिया दिएका थिए ।