पार्टीको तर्फबाट सरकारमा सहभागी चार मन्त्रीलाई फिर्ता बोलाउने निर्णयले अप्ठेरोमा परेको नेकपा एकीकृत समाजवादीको पोलिटब्युरो बैठक शुरु भएको छ । शनिवार बस्ने केन्द्रीय कमिटीको बैठकअघि सचिवालयको बैठक बसेको हो । 

पार्टी केन्द्रीय कार्यालय शान्तिनगरमा शुरू बैठकमा अध्यक्ष माधवकुमार नेपालले राजनीतिक प्रतिवेदन पेश गरेका छन् । स्थानीय तह चुनावको समीक्षा र प्रतिनिधि सभा चुनावको रणनीति बनाउन बैठक बसेको हो । चुनावको समीक्षा भनिए पनि मन्त्री फिर्ता बोलाउने निर्णयका कारण मुख्य विषय छायाँमा परेको छ । 

बैठक शुरू गर्दै अध्यक्ष नेपालले पार्टी सही दिशामा अघि बढेको बताए । उनले कुनै पनि नीति तय गर्दा परिस्थितिको ठोस विश्लेषण गरेर अगाडि बढ्ने बताए । 

केन्द्रीय कमिटी बैठकको पूर्वसन्ध्यामा सरकारमा सहभागी चार मन्त्रीसहित १० जना सांसदले संसदीय दलको बैठक माग गरेका छन् । चार मन्त्रीलाई फिर्ता बोलाउने निर्णय कार्यान्वयन नहुँदा गठन भएको एक वर्ष नपुग्दै नेकपा एस गम्भीर विवादमा फसेको छ ।