नेकपा माओवादी केन्द्रका अध्यक्ष पुष्पकमल दाहाल प्रचण्डले समाजवादी कार्यदिशा अवलम्बन गर्ने पार्टीसँग मोर्चा र गठबन्धन बनाउन प्रस्ताव गरेका छन् ।

प्रचण्डले नेकपा एमालेका अध्यक्ष केपी शर्मा ओलीलाई दक्षिण पन्थी भन्दै सो धारलाई कमजोर पार्नुपर्ने उल्लेख गरेका छन् । 

आइतवार काठमाडौंमा शुरू माओवादी केन्द्रको केन्द्रीय कमिटी बैठकमा पेश गरेको राजनीतिक प्रतिवेदनमा प्रचण्डले समाजवादी कार्यदिशा अवलम्बन गर्ने पार्टीसँग मोर्चा बनाउन प्रस्ताव गरेका हुन् । १० पृष्ठ लामो राजनीतिक प्रस्तावमा प्रचण्डले केपी ओलीको दक्षिणपन्थी प्रवृत्तिलाई परास्त गर्नुपर्ने बताएका हुन् । 

‘समाजवादी कार्यदिशा अवलम्बन गर्ने पार्टी, शक्ति र व्यक्तित्वहरूको तत्कालको मोर्चा निर्माण आजको आवश्यकता हो,’ प्रचण्डको राजनीतिक प्रतिवेदनमा उल्लेख गरिएको छ, ‘...केपी ओलीको दक्षिणपन्थी धारलाई कमजोर पार्ने, संविधान र आन्दोलनका उपलब्धिलाई खोस्न उद्दत प्रतिगामी प्रवृत्तिलाई पराजित गर्नेछ ।’ 

माओवादी केन्द्रीय सदस्य वर्षमान पुनका अनुसार प्रचण्डको प्रतिवेदनमाथि भोलि बिहान ११ बजे बस्ने बैठकमा छलफल हुनेछ ।

हेर्नुहोस– प्रतिवेदनको पूर्णपाठ