विकासको कुरुप नमूना बनेको ललितपुरको भैँसेपाटी सडक निर्माणको कुरा संसदमा पनि उठेको छ । 

मंगलवार बसेको राष्ट्रिय सभा बैठकको शून्य समयमा सांसद खीमलाल देवकोटाले भैँसेपाटी सडक अलपत्र पारिएको विषयमा सरकारको जवाफ माग गरेका हुन् । 

भैँसेपाटी सडक निर्माणका लागि आफू दर्जनाैं पटक सरोकारवाला निकायमा पुग्दा पनि कसैले नसुनेको उनले बताए । ‘यो मुलुकमा सरकार छ छैन, सरकार कसले चलाएको छ ? मैले बुझ्न सकेको छैन । भैँसेपाटीको ५ सय मिटर सडक बनाउन मैले दर्जन चोटि विभागीय मन्त्रालयका कर्मचारीलाई हारगुहार गरेँ,’ देवकोटाले भने, ‘राष्ट्रिय योजना आयोगका उपाध्यक्ष विश्व पौडेल, दुई दुईचोटी अर्थमन्त्री भएका विष्णु पौडेल, देशभरको सडक निर्माणको अवसर पाएका रघुवीर महासेठ र पूर्व उपप्रधानमन्त्री वामदेव गौतम (अहिले यही संसदमा हुनुहुन्छ) हिँड्ने त्यो बाटो ६ वर्षदेखि लथालिंग र भद्रगोल छ । यो विषयमा सरकारको विभागीय मन्त्रीको जवाफ चाहन्छु ।’ 

भैँसेपाटी सडक मर्मतमा भएको ढिलाइ र त्यसले निम्त्याएको दुर्घटनाको विषयमा लोकान्तर डटकमले दर्जनौँ पटक स्टोरी लेखेको छ । नेकपा एमालेका खेलकुद विभाग प्रमुख लीलाबहादुर थापा र विवेकशील साझा पार्टीका रवीन्द्र मिश्रले सडकमै आएर लोकान्तरमार्फत मन्त्रीहरूप्रति आक्रोश पोखेका थिए । 

भैंसेपाटी उकालोमा भत्किएको सडकमा उभिएर रवीन्द्र मिश्रले भने– पूराना पार्टीलाई भोट दिँदासम्म अवस्था यस्तै हो, सुध्रिँदैन ! pic.twitter.com/p6M37GvoJW

— Lokantar News (@Lokaantar) September 23, 2021

पछिल्लो पटक लोकान्तर डटकममा प्रकाशित सामग्रीले यो सडकको बारेमा बहस शुरू भएको छ । सडक विभागका महानिर्देशक र काठमाडौं उपत्यका सडक विस्तार आयोजनाका प्रमुखको लापरवाहीबारे लेखिएको सामग्रीपछि ठेकेदारले काम शुरू गर्ने बताएको छ । 

पढ्नुहोस् भैँसेपाटी सडकबारे लेखिएका स्टोरी

संस्मरण : सडकका खाल्डा पुरिएलान् कि भनेको उल्टै मविरुद्ध उजुरी पो परेछ !

वर्षौंदेखि भैंसेपाटी सडकको यो दुर्दशा देख्नेले भन्छन्– देशमा सरकार पनि छ र ? [फोटो/भिडियो]

यातायात मन्त्रीकै घरअगाडि यस्तो विजोग, सर्वसाधारणलाई सास्ती [भिडियो सहित]

सरकार ! नख्खुको धूलोले श्वास फेर्नै गाह्रो भो, किन जाँदैन ध्यान ? [भिडियो रिपोर्ट]