जनता समाजवादी पार्टी (जसपा) नेपालका संघीय परिषद् अध्यक्ष डा. बाबुराम भट्टराईले जसपामा ‘पार्टी कब्जा गर्ने’ सोच हाबी भएको निष्कर्ष निकालेका छन् ।

मंगलवार शुरू भएको आफूपक्षीय केन्द्रीय परिषद् सदस्यको भेलामा पेश गरिएको ‘पार्टी रूपान्तरण/पुनर्गठनको औचित्य र कार्यभार’ शीर्षकको राजनीतिक प्रतिवेदनमा भट्टराईले पार्टीका संगठनात्मक समस्या औंल्याएका छन् ।

‘पार्टी संगठन व्यवस्थित र चुस्तदुरुस्त बन्न सकेन । पार्टी समायोजनकै बेलादेखि पार्टी कब्जा गर्ने सोच हाबी भयो,’ प्रतिवेदनमा उल्लेख छ, ‘सबै पक्षको सम्मानजनक र यथोचित सहभागिता र प्रतिनिधित्व हुने गरी समयमै समायोजन सम्पन्न गर्न सहजीकरण गर्नु र सम्पूर्ण पार्टी पंक्तिलाई एकताबद्ध बनाई लक्ष्य उद्देश्यतर्फ निर्दिष्ट गर्नेभन्दा पनि अनेक झमेला र अविश्वास सिर्जना गरी महिनौं अल्झाउने, कार्यकर्ताहरूमा निराशा र झर्काे सिर्जना गर्ने र राजनीतिक तथा सांगठनिक जीवनबाट पलायन हुन बाध्य पार्ने काम गरियो ।’

एकतापछि पार्टीका संगठन, समिति र सदस्य थपिँदै र बढ्दै जानुपर्नेमा झन् घट्न थालेका प्रतिवेदनमा उल्लेख छ । 

‘पार्टी सदस्यको अभिलेखीकरण तथा नवीकरणमा कुनै सार्थक प्रयास गरिएन । केन्द्रीय निकाय र विभागहरू ३ वर्षभित्र पनि गठन हुन सकेनन् । पार्टी समितिभित्र यथोचित पदनाम दिने, जिम्मेवारी बाँडफाँट गर्ने, तहगत इन्चार्ज तोक्ने काम कहिल्यै भएन,’ प्रतिवेदनमा उल्लेख छ, ‘जनसंगठनहरू समायोजन गर्ने, प्रभावकारी परिचालन गर्ने र इन्चार्ज तोक्ने काम पनि भएन । संगठन बिल्कुलै तदर्थवादी बन्दै गयो । संगठनभित्र यतिधेरै झमेला, अविश्वास, द्वन्द्व र तनावहरू देखिए, त्यसको निरूपण समाधान गर्नुको साटो कुनै एक पक्षलाई उचाल्ने, उच्काउने, काखी च्याप्ने र झमेलालाई सदावहार बनाइराख्ने काम भयो ।’

असल नेतृत्वकर्ताले कार्यकर्ता पंक्तिलाई उत्साहित बनाउनुपर्ने प्रतिवेदनमा उल्लेख छ । ‘असल नेतृत्वले कार्यकर्ता पंक्तिलाई उत्साहित गर्दछ, निरुत्साहित हैन । समस्या हल गर्न खोज्दछ, बल्झाउने हैन । एउटै पार्टीभित्र बसेर पूर्वाग्रह, संकीर्णता, पक्षपात र अपमानको शिकार हुन अहिलेको युगका मान्छे तयार हुँदैनन् ।’

डा. भट्टराईले पार्टी निर्माण गर्ने तरिका क्षेत्रीय दलतिरै सीमित हुनतिर अभिमुख र अभिप्रेरित देखिएको निष्कर्ष निकालेका छन् । ‘पार्टी निर्माणको तरिका क्षेत्रीय दलतिरै सीमित हुनतिर अभिमुख र अभिप्रेरित देखियो । देशका अन्य भाग र प्रदेशमा पार्टी निर्माणका लागि संगठित तथा संस्थागत प्रयत्न गर्ने हुटहुटी मूल नेतृत्वमा नै देखिएन,’ प्रतिवेदनमा उल्लेख छ ।

प्रतिवेदनमा उल्लेख छ, ‘पार्टी एकताको आधारभूत बुझाइ र मनोविज्ञान मधेश आन्दोलनको जगमा बनेको पार्टी हिस्साको गरिमा, महत्त्व र संवेदनशीलतालाई आत्मसात गर्दै पार्टी एकतामा संलग्न सबै पक्षको समुचित सहभागितासहित राष्ट्रिय चरित्रको समावेशी पार्टी निर्माण गर्ने थियो । साथै कांग्रेस, कम्युनिस्ट जस्ता परम्परावादी मूलधार दलहरूको विकल्प निर्माण गर्दै देशलाई आर्थिक विकास, सुशासन र समृद्धिको युगतिर अभिमुख गर्नु थियो ।’

प्रतिवेदनमा डा. भट्टराईले पार्टी पुनर्गठन गर्नुपर्ने विषयलाई जोड दिएका छन् ।