सातदोबाटोस्थित अन्तर्राष्ट्रिय खेलकुद परिसर हातामा रहेको पौडी पोखरीमा ई टिकटको शुरूआत गरिएको छ । विगतको झन्झटिलो टिकट प्रणालीलाई विस्थापन गर्दै आइतवारदेखि ई टिकटको व्यवस्था गरिएको हो । पोखरीमा पौडी खेल्न आउनको विवरण राख्ने प्रणालीलाई सरल तथा चुस्त–दुरुस्त बनाउन ई टिकटको व्यवस्था गरिएको राष्ट्रिय खेलकुद परिषदले जनाएको छ । 

राखेपका सदस्य–सचिव टंकलाल घिसिङले ई टिकट प्रणालीको उद्घाटन गरे । अब अनलाइन टिकटको पनि चाँडै सुरुआत गर्ने परिसर प्रमुख देवराज कटवालले जनाएका छन् । ग्रिन टेक कन्सर्न प्रालि ले यो प्रविधिको व्यवस्थापन गरिहेको छ ।

‘विगतमा छपाई टिकटमा काम गर्दा धरै असहज र झन्झट हुन्थ्यो । यो प्रविधिमा काम गर्दा धेरै सहज भएको छ । अनलाइन टिकट शुरू भएपछि काउन्टरमा भीड पनि कम हुन्छ । त्यसले अझ सहज हुन्छ’ परिसरमा कार्यरत सुरत खत्रीले बताए ।