राष्ट्रिय सभाका अध्यक्ष गणेशप्रसाद तिमिल्सिनाले पार्टीको ह्वीप लागे पनि गलत कुरालाई गलत भन्नसक्ने आँट गर्न बागमती प्रदेशका मुख्यमन्त्री राजेन्द्रप्रसाद पाण्डेलाई चुनौती दिएका छन् । सोमवार बागमती प्रदेशको राजधानी हेटौंडामा भएको संघीयता कार्यान्वयन अध्ययन तथा अनुगमन विशेष समितिको अन्तरक्रिया कार्यक्रममा बोल्दै उनले संघीय ऐनहरू पास भइरहँदा प्रदेश र स्थानीय तहको अधिकार खोसिने गरी आएको खण्डमा गलत हो भन्ने पक्षमा बोल्न मुख्यमन्त्रीलाई सुझाएका हुन् । 

सोही कार्यक्रममा बोल्ने क्रममा बागमती प्रदेशका मुख्यमन्त्री राजेन्द्रप्रसाद पाण्डेले हालै पारित काठमाडौं उपत्यका सार्वजनिक यातायात व्यवस्थापन प्राधिकरण विधेयक २०७६ र नेपाल प्रहरी र प्रदेश प्रहरी कार्य सञ्चालन सुपरीवेक्षण र समन्वय ऐन, २०७६ लाई संशोधन गर्न बनेको विधेयक संघीयता र संविधानविपरीत भएको बताएका थिए ।

‘राष्ट्रियसभाले संविधान र संघीयताविरुद्धमा विधेयकहरू किन पारित गरेको ?’ भन्ने मुख्यमन्त्री पाण्डेको आरोपको जवाफ दिँदै अध्यक्ष तिमिल्सिनाले दलको ह्वीप नलाग्ने गरेर सांसदहरूलाई स्वतन्त्रता प्रदान गर्न आवश्यक रहेको बताए । उनले अहिले बनेको गठबन्धनको सरकार टुट्ने अवस्थामा संघीयताको हक, अधिकार नहेरी किन गठबन्धन बचाउनका लागि हात उठाउनुहुन्छ ? भन्दै मुख्यमन्त्रीलाई प्रतिप्रश्न गरेका थिए । 

अध्यक्ष तिमिल्सिनाले दलको आदेश र ह्वीपका कारण सांसदहरूले पद खोसिने डरले पनि संघीयताको अधिकार खोस्ने विधेयकमा सहमति जनाइरहेको दाबी गरे । उनले सरकारले ल्याएका कुनै पनि विधेयकहरू फेल भएमा सरकार रहँदैन भन्ने चिन्ताले सबै विधेयकमा सांसदहरु सहमति जनाउन बाध्य बनेको उल्लेख गरे । उनले हालै आएको नागरिकता विधेयकमा पनि संसदमा छलफलका क्रममा विरोध जनाएका सांसदहरू पास गर्ने बेलामा भागेको बताए । 

‘हालै नागरिकता ऐन आयो, नागरिकता ऐनको बारेमा प्रतिनिधि सभा, राष्ट्रिय सभामा विभिन्न ढंगले बोल्नुभयो । बोल्ने बेलामा दरो ढंगले बोल्नुभयो, अहिलेका कुराहरु ठीक छैनन् भनेर तर भोटिङ गर्ने बेलामा टाप ठोक्नुभयो, किन बोलेअनुसार हात उठाउन सक्नुभएन ?’ उनले भने ।