नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले देशको आर्थिक स्थिति बलियो बनाउनका लागि कृषिमा आधारित उद्योगहरूको विकास गर्नुपर्ने बताएका छन् । आइतवार काठमाडौंमा आयोजित नेपाल युवा उद्यमशिलता शिखर सम्मेलन २०२२ लाई सम्बोधन गर्दै उनले देशको आर्थिक विकासको मुख्य मेरुदण्ड कृषि नै भएको बताए । 

देशको अर्थतन्त्र झनै पछाडी धकेलिँदै गएकोप्रति चिन्ता व्यक्त गर्दै उनले अर्थतन्त्रलाई बलियो बनाउन कृषिमा आधारित उद्योगहरूको विकास गर्नुपर्ने धारणा राखे । प्रचण्डले कृषिपछि जलविद्युत, पर्यटन, जडिबुटी र खनिजको विकासले देशको अर्थतन्त्रमा टेवा पुग्ने बताए । 

‘देशको लागि, समाजको लागि र हामी सबैको लागि आवश्यक कुरा भनेको कृषि नै हो । कृषिमा आत्मनिर्भर हुने कुरा र कृषिमा आधारित उद्योगहरूको विकास गर्ने कुरा नेपाल र नेपालीहरूको लागि सबैभन्दा महत्वपूर्ण कुरा छ’, उनले भने, ‘यो हामी सबैको लागि ठूलो चिन्ताको विषय हो । ५०÷६० वर्ष अगाडि हामी खाद्यान्नमा आत्मनिर्भर थियौँ । हामी सबैचिज निर्यात गर्नसक्ने अवस्थामा थियौँ । अहिले उल्टो भयो किन यस्तो भइराखेको छ हाम्रो चिन्ताको विषय भयो । हामी धेरै पढ्यौँ, लेख्यौँ । धेरै जान्ने सुन्ने पनि भयौँ । तर, देशको आर्थिक विकासको स्थितिबाट हेर्दा त्यो अगाडि होइन पछाडी गएको देखिनु ठूलो चुनौती हो ।’

उनले युवाहरूले उद्यमशील हुन चाहेमा देशलाई आत्मनिर्भर अर्थतन्त्रको बाटोमा हिँडाउन सकिने बताए । प्रचण्डले धन, सम्पत्ति कमाउनु र देशलाई सभ्य बनाउनु फरक कुरा रहेको भन्दै उनले समाजलाई सभ्य बनाउने गरी र संसारभर नेपालीहरूको आत्मसम्मान हुनेगरी सम्पत्ति आर्जन गर्न युवाहरूलाई आग्रह गरे । उनले लक्ष्यप्राप्तिका लागि दृढ हुनुपर्नेमा जोड दिए । उनले आफ्नो बाँकी जीवन आर्थिक क्रान्तिको लागि व्यतित गर्ने बताए ।