प्रहरी निरीक्षक (इन्सपेक्टर) सञ्जय बुचाको कमाण्डमा खटिएको प्रहरी टोलिले हातहतियारसहित एक व्यक्ति पक्राउ गरेको छ । टोलीले ताप्लेजुङको मिक्वाखोला गाउँपालिका वडा नं ४ बस्ने नवीनकुमार नाल्बोलाई पक्राउ गरिएको हो । उनीमाथि आफ्नै भाइ शुक्रराज नाल्बो लिम्बूको भरुवा बन्दुकबाट गोली प्रहार गरी हत्या प्रयासको आरोप छ ।

लिम्बू पक्राउ परेपछि उनको घरमा खानतलासी गर्दा भरुवा बन्दुक नाल एक थान, बारुदको कालो धुलो पदार्थ प्लाष्टिकको पोका एक थान, सेतो बट्टामा बारुद रहेको एक थान, भरुवा बन्दुकमा लोड गर्न प्रयोग गर्ने गोली (फलामका छर्रा) ६ ओटा, फलाम काट्न प्रयोग गर्ने औजार एक थान, दापसहितको खुकुरी एक थान, भरुवा बन्दुकको बटजस्तो देखिने काठको वस्तु एक थान, रडको टुक्रा दुई थान बरामद गरिएको छ ।

पक्राउ परेका लिम्बूविरुद्ध कर्तव्य ज्यान तथा हातहतियार खरखजना मुद्दा दर्ताको तयारी भइरहेको प्रहरीले जनाएको छ ।