कालीकोटमा आयोडिनयुक्त नूनको अभाव भएको छ ।

जिल्लामा आयोडिनयुक्त नून वितरण गर्ने साल्ट ट्रेडिङ कर्पोरेसन शाखा कार्यालय मान्ममा आयोडिनयुक्त नून सकिएका कारणले नूनको अभाव भएको हो ।

कालीकोटमा साल्ट ट्रेडिङ कर्पोरेसनले आयोडिनयुक्त नून बिक्री गर्दै आएकोमा ठेकेदारले नून ढुवानी नगर्दा अभाव भएको हो । चालू आर्थिक वर्षमा आयोडिनयुक्त नून ढुवानीको जिम्मा लिएको नमूना ढुवानी सेवाले ३ हजार ५०० क्विन्टल आयोडिनयुक्त नून ढुवानी गर्नुपर्नेमा हालसम्म ३५५ क्विन्टल मात्र ढुवानी गरेको साल्ट ट्रेडिङ कर्पोरेसन शाखा कार्यालय कालीकोटका कर्मचारी लालबहादुर बमले जानकारी दिए ।

‘अहिले डिपोमा आयोडिनयुक्त नून पनि सकिएको छ,’ उनले भने, ‘हामीले बिक्री गर्दै आएको सहुलियतको नून ढुवानीको जिम्मा लिएको ठेकेदार कम्पनीले ढुवानी नगर्दा नूनको अभाव भएको हो ।’

साल्ट ट्रेडिङ कर्पोरेसन शाखा कार्यालय कालिकोटले अर्को सूचना नआएसम्म गाउँका नागरिकलाई आयोडिनयुक्त नून लिन नआउन आग्रह गरेको छ । ढुवानीकर्तालाई नियमित ताकेता गर्दा पनि मागअनुसार नून ढुवानी नगरेको शाखा कार्यालयका कर्मचारी बमको भनाइ छ । 

‘आयोडिनयुक्त नून ढुवानी गर्नका लागि ठेकेदार कम्पनीले मानेनन्,’ उनले भने, ‘ढुवानीका अन्य विकल्पका विषयमा छलफल भइरहेको छ ।’

कालीकोट जिल्लामा साल्ट ट्रेडिङ कर्पोरेसनले अन्य ठाउँको भन्दा सहुलियत दरमा नून बिक्री गर्ने गरेको बमले जानकारी दिए । ‘साविक कर्णालीका जिल्लामा आयोडिनयुक्त नूनमा साल्ट ट्रेडिङ कर्पोरेसनले ५० प्रतिशत छुटका बिक्री गर्दै आएको छ,’ उनले भने, ‘सहुलियतको नून उपभोक्ता पाउँदा ढिके नून विस्थापित नै भएको छ ।’