नेकपा एमाले निकटको विद्यार्थी संगठन अनेरास्ववियुको २३औं महाधिवेशन शुरू भएको छ ।

मंगलवारदेखि शुरू भएको महाधिवेशनबाट १७ पदाधिकारीसहित १९९ सदस्यीय केन्द्रीय कमिटी निर्वाचित हुँदैछ । एमाले अध्यक्ष केपी शर्मा ओलीले मंगलवार अपराह्न महाधिवेशनको उद्घाटन गरेपछि अध्यक्ष मण्डलको घोषणा हुनेछ । त्यसपछि निर्वाचन प्रक्रिया शुरू हुने बताइएको छ ।

सकेसम्म अनेरास्ववियुले सहमतिमा नेतृत्व चयनको प्रक्रिया अघि बढाउने भएको छ । हुँदै नभए मात्रै निर्वाचनबाट नेतृत्व चयनको प्रक्रिया अगाडि बढाउने जानकारी अध्यक्ष सुनिता बरालले दिइन् । मंगलवार प्रतिनिधिको अन्तिम नामावली सार्वजनिक गर्ने, मनोनयन कार्यक्रम र बिहीवार मतदान गर्ने कार्यक्रम रहेको अनेरास्ववियुले जनाएको छ ।

निर्वाचन हुँदा अनेरास्ववियुले विद्युतीय मतदान मशिनको प्रयोग गर्ने भएको छ । 

को–को छन् अध्यक्ष सहितका दाबेदार ? 

२–२ वर्षमा हुनुपर्ने महाधिवेशन यसपटक ७ वर्षमा बल्ल हुन लागेको हो । लामो समयदेखि महाधिवेशन नहुँदा यसपटक १७ पदाधिकारी र १९९ केन्द्रीय सदस्यका लागि दाबेदार धेरै देखिएका छन् । 

अहिलेकी अध्यक्ष बराल प्रतिनिधि सभामा सांसद भइसकेकी छन् । यसैले उनी दाबेदार छैनन् ।

यसपटक वरिष्ठ उपाध्यक्ष आरसी लामिछाने र महासचिव समिक बडाल अध्यक्षका मुख्य दाबेदार छन् । सर्वसम्मत हुँदा बडाल नै अध्यक्ष हुने सम्भावना बढी रहेको बताइन्छ । निर्वाचन हुँदा पनि लामिछानेभन्दा बराल बलिया दाबेदार हुने अनेरास्ववियुका एक नेताले जानकारी दिए ।

बडाललाई नै अध्यक्ष बनाउने गरी अध्यक्ष ओली निकट नेताले तयारी गरेको बुझिएको छ । 

चुनाव हुँदा अहिलेका उपाध्यक्ष झपिन्द्र खत्री, मोती विक र लोकेश निरौला सहितका दाबेदार देखिएका छन् तर सहमति हुँदा खत्रीले आफू महासचिवमा तयार हुने बताएका छन् । 

महासचिवका लागि कल्पना वाइबा, सुदर्शन शिवाकोटी, नरेश रोकाया, भाष्कर खनाल, नारायण घर्ती, धर्म गिरी र गोविन्द गिरी सहितका विद्यार्थी नेताको दाबी छ ।