हेली एभरेष्टको हेलिकप्टर तीन सातादेखि सामानसहित धौलागिरि आधार शिविरमै पल्टिरहेको छ । यो हेलिकप्टरको निरीक्षण नसकिएकाले २६ चैतदेखि अलपत्र अवस्थामा हिउँमा पल्टिरहेको छ ।

हेली एभरेष्टको ९ एन एएनबी कलसाइनको हेलिकप्टर २६ चैतमा धौलागिरि आधार शिविरमा दुर्घटनामा परेको थियो । उक्त हेलिकप्टर धौलागिरि हिमालको तल्लो इटालियन बेसक्याम्पबाट ११ हजार फिटको बेसक्याम्पसम्म सामान ओसार्दै गर्दा डिसब्यालेन्स भएर हेलिकप्टर हिउँमा चिप्लिएको थियो । 

क्याप्टेन प्रिया अधिकारीले उडाएको उक्त हेलिकप्टर अवतरण गर्ने क्रममा ओभरटर्न भएर पल्टिएको प्रारम्भिक अध्ययनले देखाएको छ । उक्त घटनामा हेलिकप्टर चालक अधिकारी सामान्य घाइते भएकी थिइन् । 

उक्त हेलिकप्टर ३ सातादेखि जहाँ जस्तो अवस्थामा पल्टिएको थियो अहिले पनि त्यस्तै अवस्थामा छ । मौसमले साथ नदिएका कारण सरकारी अध्ययन टोलीसमेत तेस्रो प्रयासमा मात्रै आधार शिविर पुगेर निरीक्षण गरेको हेली एभरेष्टका बजार निर्देशक सीताराम सापकोटाले बताए । उनका अनुसार मौसमले साथ नदिएका कारण अहिलेसम्म बीमाको टोली भने पुग्नै सकेको छैन । 

हेलिकप्टरको प्रारम्भिक निरीक्षण सरकारी टोलीले गरिसकेको भए पनि बीमाको टोली नपुग्दा न त हेलीबाट सामान निकाल्न पाइएको छ न त यसको प्रयोग नै गर्न । हेलीमा पुगेको क्षतिको अवस्था मूल्यांकन गरेपछि मात्रै थप प्रक्रिया अगाडि बढ्ने पनि सापकोटाले बताए ।

सापकोटाका अनुसार यो हेलिकप्टर त्यहाँबाट निकाल्न पनि बीमाको टोली पुगेर मूल्यांकन गर्नुपर्ने हुन्छ । ‘हलीको बीमा भएको र क्षतिको बारेमा बीमा दाबी गर्नुपर्ने भएकोले पनि आवश्यक प्रक्रिया पूरा नभएसम्म हिउँमा पल्टिएको हेलिकप्टरलाई केही गर्न मिल्दैन’, उनले भने ।