कैलाश सिरोहियाको गिरफ्तारी सत्ताको चरम दुरुपयोग: राजेन्द्र लिङ्देन

राप्रपाका अध्यक्ष राजेन्द्र लिङ्देनले कान्तिपुर पब्लिकेसनका अध्यक्ष कैलाश सिरोहियाको गिरफ्तारी सत्ताको चरम दुरुपयोग भएको टिप्पणी गरेका छन् । 

सहकारी ठगी सम्बन्धमा कान्तिपुरले प्रकाशित गर्दै आएका प्रमाण र तथ्यहरूलाई गृहमन्त्री रवि लामिछानेले असत्य साबित गरेर देखाउनुपर्नेमा यसप्रकारको गिरफ्तारी सत्ताको चरम दुरुपयोग भएको लिङ्देनको धारणा छ । 

‘सरकारबाट जुन समय र तरिकाबाट सिरोहियालाई गिरफ्तारी गरियो सर्वथा अनुपयुक्त छ’, लिङ्देनले मंगलबार फेसबुकमा लेखेका छन्, ‘ कान्तिपुरले लगातार रूपमा सहकारी ठगी सम्बन्धमा प्रकाशित गर्दै आएका प्रमाण र तथ्यहरूलाई असत्य साबित गरेर देखाउनुपर्नेमा यसप्रकारको गिरफ्तारी सत्ताको चरम दुरुपयोग हो।’