भारतीय क्रिकेट बोर्ड बीसीसीआईका सचिव जय शाहले एसिया कपको आयोजनास्थलको बारेमा छिट्टै निर्णय लिइने बिहीवार बताएका छन् ।

आईपीएल २०२३ को फाइनल हेर्न श्रीलंका, बंगलादेश र अफगानिस्तान क्रिकेट बोर्डका अधिकारीहरू आउने जानकारी दिँदै उनले त्यही समय पारेर आयोजनास्थलका विषयमा कुराकानी गरिने बताए । 

यो वर्ष एसिया कपको आयोजना पाकिस्तानले गर्ने भएको छ । तर भारतीय क्रिकेट टीमले सरकारको अनुमतिविना पाकिस्तानको यात्रा गर्न पाउँदैन । 

त्यसैले पाकिस्तान क्रिकेट बोर्डका अध्यक्ष नजम सेठीले हाइब्रिड मोडलको प्रस्ताव राखेर चारवटा खेल मात्र पाकिस्तानमा आयोजना गर्ने अनि अरू खेलहरू तटस्थ मुलुकमा खेल्ने भनेका छन् । 

यस फर्मुलाअनुसार, श्रीलंका, बंगलादेश, नेपाल र अफगानिस्तानले लीग चरणका खेलहरू पाकिस्तानमा खेल्नेछन् । भारतले चाहिँ तटस्थ भूमिमा आफ्नो खेल खेल्नेछ । 

भारत र पाकिस्तानबीचको खेल श्रीलंकामा खेलिन सक्छ । तर पीसीबी उक्त म्याच दुबईमा खेलाउन चाहन्छ । 

एसिया कपको आयोजना १ देखि १७ सेप्टेम्बरसम्म गरिनेछ । 

आफ्नो भूमिमा खेल्न आउनका लागि पाकिस्तानले भारतलाई आग्रह गरेको भए पनि खेलाडीहरूको सुरक्षाको कारण देखाउँदै भारतले त्यहाँ नखेल्ने भनिरहेको छ ।