निजी कलेजलाई दिएको रकम फिर्ता माग गर्दै ३ महिनादेखि महानगरको गेटमा इन्दिराको धर्ना !

विराटनगर महानगरपालिकाअगाडि एक महिला तीन महिनादेखि धर्नामा थिइन् । विराटनगरको बरगाछीस्थित गोग्राहा माध्यमिक विद्यालयको सञ्चालक समिति पूर्वअध्यक्ष समेत रहेकी इन्दिरा चापागाईं विद्यालयको बेतिथिवरिुद्ध गत जेठदेखि महानगरको गेटमा एक्लै धर्ना बसिरहेकी थिइन् । निजी स्रोतबाट सञ्चालित  गोग्राहा कलेजलाई निकासा गरिएको ५ लाख रुपैयाँ बजेट फिर्ता गर्नुपर्ने उनको माग छ ।  उनले स्कूलबाट कलेज हटाउनसमेत माग गरेकी छन् ।

चापागाईंले यसअघि सुशासनका लागि प्रदेशसभा सचिवालय र प्रदेशका मन्त्रालयमा पनि एक्लै धर्ना दिएकी थिइन् ।

पूर्वाञ्चल विश्वविद्यालयबाट अनुमति लिएर गोग्राहा कलेज सञ्चालित छ । गोग्राह स्कुलको संरचनामै कलेज पनि रहेको छ । पहिला कलेज विद्यालय मातहत नै रहे पनि पछिल्लो समय भने छुट्टै बनाइएको छ । कलेजले शिक्षा संकायतर्फ बीएडको कक्षा सञ्चालन गर्दै आएको छ ।

बेथितिविरुद्ध तीन महिनादेखि धर्ना बसिरहेकी चापागाईंलाई प्रहरीले पक्राउ गरेको छ । निधारमा रातो फेटा बाँधेर उभिने महिलालाई मेयरकै निर्देशनमा प्रहरीले पक्राउगरी अभद्र व्यवहारमा मुद्दा चलाएको हो । महानगरको उजुरीको आधारमा चापागाईंलाई पक्राउगरी अभद्र व्यवहारमा मुद्दा चलाएको जिल्ला प्रहरी कार्यालय मोरङका डीएसपी छेदीलाल कामतीले जानकारी दिए । 

मेयर कोइरालालाई अभद्र व्यवहार गरेको भन्दै विराटनगर महानगरपालिकाले जिल्ला प्रशासन कार्यालय मोरङमा उजुरी दिएको थियो । महानगरले उजुरीपछि विराटनगर ५ निवासी ५२ वर्षीया चापागाईंलाई पक्राउगरी अभद्र व्यवहार मुद्दा चलाएको हो । 

महानगरको कामकारवाहीप्रति प्रश्न उठाउँदै धर्ना बसेकी चापागाईंलाई पक्राउगरी मुद्दा चलाएपछि नगर प्रमुख नागेश कोइरालाको तीव्र आलोचना भइरहेको छ । चापागाईँ पक्राउ गरेपछि मेयर कोइरालाको चर्को विरोध हुन थालेको छ । सामाजिक अभियान्ताहरूले समेत उनको विरोध गर्न थालेका छन् । बेथिति हटाउनुको साटो उनलाई पक्राउ गरिएको भन्दै अभियन्ताहरूले आक्रोश व्यक्त गरेका छन् । 

मेयर कोइरालाले भने आफ्नो बचाउ गरेका छन् । मेयर कोइरालाको सचिवालयले विज्ञप्ति जारी गर्दै महानगरको गेटमा अराजक ढंगले विरोध गरेपछि पक्राउ गरिएको दाबी छ । ‘विगत ३ महिनादेखि महानगरको गेटमा अराजक ढंगले चापागाईंले विरोध प्रदर्शन गर्दै आएको सर्वविदितै छ । झोलामा बोकेको पेटीकोटले मेयरलाई छोप्न खोज्ने, मेयर चढेको गाडीमा पेटीकोटले हान्ने, लात्ती हान्ने, झम्टिनेलगायत अशोभनीय शब्द प्रयोगगरी गालीगलौज गर्नुका साथै मेयरलाई मुख्य गेटबाट प्रवेश गर्न अवरोध पुर्‍याएको अवगत गराउन चाहन्छौं,’ विज्ञप्तिमा भनिएको छ, ‘भित्र प्रवेश गरिसकेपछि पनि अझै अराजक किसिमबाट गालीगलौज गर्ने, भित्रै प्रवेश गरेर सेवा प्रवाहलाई नै असर पार्नुका साथै मोबाइलमा समेत गालीगलौजसहितका म्यासेज बारम्बार पठाउने गरेको जानकारी गराउँदछौं ।’

चापागाईंलाई पटक–पटक बोलाएर सम्झाउने प्रयत्न पनि गरे पनि आन्दोलन नरोकेको महानगरले दाबी गरेको छ ।