उद्धव थापा : पहिलोपटक २२ र दोस्रोपटक ३८ दिनमा पदमुक्त

कोशी प्रदेशका सभाध्यक्षलाई हस्ताक्षर गराउने निर्णय अन्ततः सत्ता गठबन्धनका लागि प्रत्युत्पादक बनेको छ ।

गत साउन १६ गते दोस्रोपटक मुख्यमन्त्रीमा नियुक्त भएका उद्धव थापालाई सर्वाेच्च अदालतले पदमुक्त गरेको छ ।

थापाले प्रदेशसभा बैठकको अध्यक्षता गरेका इस्राइल अन्सारीलाई मतदान गर्न लगाएर ४ भदौमा प्रदेशसभाबाट विश्वासको मत लिएका थिए ।

मुख्यमन्त्री थापालाई विश्वासको लिने मिति ताकेर उपसभामुख सिर्जना दनुवार बिरामी बिदामा बसेकी थिइन् ।

उपसभामुख दनुवार विश्वासको मत लिने दिन अर्थात भदौ ४ गते कांग्रेसका इस्राइल मन्सुरीलाई सभाको जिम्मा दिँदै बिरामी बिदामा बसेपछि मुख्यमन्त्री थापाले विश्वासको मत लिएका थिए ।

थापालाई सर्वाेच्च अदालतले ३८ दिनमा पदमुक्त गरिदिएको छ । यसअघि उनी पहिलोपटक २१ असारमा प्रदेशको मुख्यमन्त्री बनेका थिए ।

पार्टीभित्रको आन्तरिक प्रतिस्पर्धामा कहिल्यै नहारेका मुख्यमन्त्री थापाका लागि मुख्यमन्त्री पद भने फलदायी बन्न सकेन ।

विश्वासको मतमै झमेला परेपछि उनी दोस्रो पटक पनि मुख्यमन्त्रीबाट पदमुक्त बनेका हुन् ।

पहिलोपटक २२ दिनमै मुख्यमन्त्रीबाट पदमुक्त बनेका उनी दोस्रोपटक भने ३८ दिनसम्म पदमा आसीन भए ।​

पहिलोपटक असार २७ मा सर्वाेच्च अदालतले दीर्घकालीन कुनै काम नगर्न आदेश दिएपछि थापा नेतृत्वको सरकार कामचलाउ बन्न पुगेको थियो ।

दोस्रोपटक सार्वोच्चले भदौ ७ गते अन्तरिम आदेश दिँदै विश्वासको मत लिने प्रक्रिया त्रुटीपूर्ण रहेको भन्दै कामचलाउको हैसियतमा सीमित गरिदिएको थियो ।