भारतको उत्तरप्रदेशस्थित अयोध्यामा नवनिर्मित राम मन्दिरको आज (सोमबार) प्राण प्रतिष्ठा गरिँदै छ । हिन्दूहरूका भगवान् रामको जन्मस्थल मानिने अयोध्यामा आज भव्य मन्दिरको प्राण प्रतिष्ठा गर्न लागिएको हो । 

अयोध्यामा राम मन्दिरको प्राण प्रतिष्ठा गरिँदा उत्सव मनाउन नेपालको तराईका धेरै स्थानीय तहले बिदा दिएका छन् । रूपन्देहीको रोहणी गाउँपालिकाले बिदा दिएको छ । बिदासँगै माछा मासु, र मदिरा सेवन, बेचविखन तथा पशु काटमार नगर्न आग्रह गरिएको अध्यक्ष विद्याप्रसाद यादवले बताए । 
 
रूपन्देहीकै ओमसतिया गाउँपालिकाले सोही अनुसारको सूचना जारी गर्दै स्थानीय बिदा दिएको छ । कपिलवस्तुको कृष्णनगर नगरपालिका, शुद्धोधन गाउँपालिका, महाराजगञ्ज नगरपालिका, मायादेवी गाउँपालिका, शिवराज नगरपालिका र मायादेवी गाउँपालिकाले पनि स्थानीय बिदा घोषणा गरेका छन् । 

तराईमा शीतलहर चलिरहँदा जाडो बिदासमेत नदिएका पालिकाहरूले अयोध्यामा हुने राम मन्दिरको प्राण प्रतिष्ठामा स्थानीय बिदा दिइरहेका छन् । 

अयोध्यामा हुन लागेको प्राण प्रतिष्ठाको अनुष्ठानप्रति नेपालको तराई-मधेशका हिन्दूहरूमा उत्सवको माहौल देखिएको छ । स्थानीय सरकारले आफूखुसी बिदा त गरेकै छन् हिन्दूहरूको बाहुल्य रहेको दक्षिणी तराईका स्थानीय समुदायमा पनि उत्साह छाएको हो । 

कतै हनुमान आरधना, हुनुमान चालिसा पाठ, राम धुनजस्ता धार्मिक अनुष्ठानको तयारी भइरहेका छन् ।

भैरहवा परासीमा सोमबार बृहत् र्‍याली आयोजना गरिएको छ । बाँकेको नरैनापुरमा आइतबार दिउँसो जय श्रीरामको नारासहित र्‍याली गरिएको थियो । 

त्यस्तै बुटलमा पनि आइतबार र्‍यालीले गरिएको थियो । मधेश प्रदेशको वीरगञ्ज महानगरपालिकाले सोमबार पशु बध, मदिरा तथा माछामासु बिक्रीजस्ता क्रियाकलाप निषेध गरेको छ । 

भारतको राजनीतिक र सांस्कृतिक प्रभावका कारण नेपालका स्थानीय तहले अयोध्यामा राम मन्दिरको प्राण प्रतिष्ठा हुँदा बिदा दिइरहेको समाजशास्त्रीहरू बताउँछन् । यस अवसरमा भारतको केन्द्र सरकारले देशभर नै आधा दिनको छुट्टी दिने घोषणा गरेको छ । 

मन्दिरको गर्भगृहमा आज रामको भव्य मूर्ति राखेर प्राण प्रतिष्ठा गरिँदैछ । स्थानीय समयअनुसार दिउँसो १२:२० बजेको साइतमा राम मन्दिरको प्राण प्रतिष्ठा हुने भारतीय सञ्चार माध्यमहरूले जनाएका छन् । प्राण प्रतिष्ठामा केही नेपाली पूजारी पनि सहभागी छन् । 

सन् २०१९ मा भारतको सर्वोच्च अदालतले राम मन्दिर स्थापना गर्ने विषयमा गरेको फैसलापछि मन्दिर बनाइएको हो । अदालतको फैसलापछि सन् २०२० मा राम मन्दिर निर्माण कार्य प्रारम्भ गरिएको थियो । मन्दिर परिसरले ६७ एकड जमिन ओगटेको छ । 

प्राण प्रतिष्ठाअघि भारतीय प्रधानमन्त्री मोदी ११ दिनको उपबासमा छन् । सन् २०२४ मा लोकसभा निर्वाचनअघि हुन लागेको राम मन्दिरको उद्घाटनले भारतीय जनता पार्टीको चुनाव नतिजालाई प्रभाव पार्ने अपेक्षा गरिएको छ ।