बलियो प्रतिद्वन्द्वी अष्ट्रेलियामाथि अतिरिक्त समयमा स्तब्ध पार्दै दक्षिण कोरिया कतारमा जारी एसियन कप फूटबल प्रतियोगिताको सेमिफाइनलमा प्रवेश गरेको छ । अन्तिम समयमा १० जनामा सीमित अष्ट्रेलियामाथि दक्षिण कोरियाले २–१ को जित निकाल्न सफल भएको हो ।

खेलमा दक्षिण कोरियाले पछि परेको अवस्था उल्ट्याएको हो । यद्यपि शुरुवातमा दक्षिण कोरियाले अग्रता लिए पनि गोल भने रद्द हुन पुग्यो । ३१औं मिनेटमा योङ–वु सियोलले गोल गरे पनि भिडियो असिस्टेन्ट रेफ्रीले अफसाइड घोषित गरेका थिए ।

खेलको ४१औं मिनेटमा अष्ट्रेलियाले खेलमा अग्रता लिन सफल भयो । नाथनिल एटकिन्सनको क्रसमा क्राइग गुडविनले भली प्रहारमा गोल गर्दै अष्ट्रेलियालाई अग्रता दिलाएका थिए ।

तर दक्षिण कोरियाले पुनः नाटकीय रूपमा खेलमा बराबरी गर्यो । प्रि–क्वार्टरफाइनलमा साउदी अरेबियाविरुद्ध अतिरिक्त समयमा बराबरी गर्दै टाइब्रेकरमा जीत हासिल गरेको कोरियाले पुनः उही समयमा बराबरी गोल गरेको थियो ।

अतिरिक्त समयको पाँचौं मिनेटमा कप्तान सन ह्युङ मिनले जितेको पेनाल्टीमा ह्वांग हि–चानले पेनाल्टीमा गोल गर्दै खेल बराबरीमा ल्याई अतिरिक्त समयमा धकेलेको थिए ।

अतिरिक्त समयको १३औं मिनेटमा दक्षिण कोरियाले अग्रता लियो । कप्तान सनले उत्कृष्ट फ्रिकिक प्रहारमा गोल गर्दै कोरियालाई अग्रता दिलाए ।

अतिरिक्त समयको पहिलो हाफको अन्त्यतिर एइडन ओ’निलले रातो कार्ड पाएपछि अष्ट्रेलिया १० जनामा सीमित भएको थियो । त्यसपछि पनि कोरियाले अवसरहरू सिर्जना गरेको थियो । तर थप गोल भने गर्न सकेन ।

दक्षिण कोरियाले अब सेमिफाइनलमा जोर्डनविरुद्ध खेल्नेछ ।

आत्मघाती उपहार गोलको सहयोगले ताजकिस्तानमाथि १–० को कठिन जीत निकाल्दै जोर्डन पनि शुक्रवार नै एसियन कपको सेमिफाइनल प्रवेश गरेको छ ।

वख्दत खानोनोभबाट प्राप्त उपहार गोल नै जोर्डनको जीतमा निर्णायक बन्यो । उनले खेलको ६६ औं मिनेटमा आत्मघाती गोल गर्न पुगेका थिए ।

जोर्डन इराकलाई ३–२ तथा ताजकिस्तान संयुक्त अरब इमिरेट्स (यूएई) लाई पेनाल्टी सुटआउटमा ५–३ ले स्तब्ध बनाउँदै क्वार्टरफाइनलमा पुगेका थिए ।