रुपन्देहीको एक गौतम परिवारले बुहारीलाई छोरीजस्तै अन्माएर पठाएका छन् ।

गुल्मीको चन्द्रकोट गाउँपालिका–२ शान्तिपुर घर भई हाल रुपन्देहीको सैनामैनामा बस्दै आएका लक्ष्मीधर गौतमले बुहारीलाई दोस्रो विवाह गराइदिएका हुन् ।​

लक्ष्मीधरले ६ वर्ष अघि जेठो छोरा ध्रुव गौतम र धना न्यौपानेको धुमधानका साथ विवाह गराएका थिए ।

२७ वर्षीय धुव्रको तीन वर्ष अघि करेन्ट लागेर मृत्यु भएपछि ​लक्ष्मीधरले परिवारको सहमतिमा बुहारीको अर्को विवाह गराएका हुन् ।बुहारी धनाको भविष्यका लागि सैनामैना रामापुर कलौनीका अमृत पौडेलसँग कन्यादान दिएर अन्माएका हुन् ।​​​

धना र अमृतको विवाह शुक्रवार सामाजिक परम्पराअनुसार बुटवलस्थित एक पार्टी प्यालसेबाट गरिएको हो ।​​​​

धनाको वैवाहिक समारोह सकेपछि ५४ वर्षका लक्ष्मीधरले लोकान्तरसँग भने, ‘बुहारी बनाएर धनालाई भित्राएँ, छोरी बनाएर अन्माएँ, उसको (धना)को जीवनलाई सुखी र खुसी देख्नको लागि बुहारीकै इच्छाअनुसार विवाह गरिदिएँ।’

नेपाली समाजले परम्परागत र रूढिवादी संस्कारबाट मुक्ति पाइरहेको उदाहरणका रुपमा यो विवाहलाई यस क्षेत्रमा धेरैले लिएका छन् ।​​​​​

लक्ष्मीधर इजरायलमा रोजगारीको लागि मजदुरी गर्थे । जेठो छोरा ध्रुवले सैनामैनामा इलेक्ट्रिक पसल सञ्चालन गर्थे । विक्रम सम्बत २०७४ मा झापाको विर्तामोडकी धनासँग उनको प्रेम विवाह भएको थियो ।​

२०७७ फागुनमा छिमेकीको घरमा पङ्खा बिग्रिएपछि उनलाई बनाउनको लागि बलाइयो ।

ध्रुव पङ्खा बनाउन त्यतातिर गए । पंखा बनाउने क्रममा अकस्मात् विद्युत सट भएर ध्रुवलाई करेन्ट लाग्यो । उनी त्यहीँ ढले । उपचारको लागि बुटवलस्थिल लुम्बिनी प्रादेशिक अस्पतालमा ल्याउँदै गर्दा उनको बाटोमै बाटोमै निधन भएको थियो ।

परिवारमा ठूलो वज्रपात आइ लाग्यो । विवाह भएको तीन वर्ष भए पनि ध्रुव र धनाबाट बालबच्चा जन्मिएका थिएनन् । २७ वर्षको कलिलो उमेरमा धनाको  सिउँदो पुछियो । परिवारले त्यो दुखद पीडालाई बिर्सनुपर्ने बाध्यता नै थियो ।

दुर्घटनामा छोरो गुमेपछि परिवारले धनालाई झन् धेरै माया गरे । अर्कातिर लाऊँलाऊँ खाऊँखाऊँ भन्ने उमेरमा बुहारी धना विधवा बनेको देखिरहनुपर्दा परिवारमा पीडा त थियो । ‘जोसँग जीवन बिताउँछु भनेर प्रेमलाई विवाहमा परिणत गएर जोडी बनेर उहीँ नै रहेन’, गौतम भन्छन्, ‘बालबच्चा पनि भएका थिएनन् । बुहारी धनाको इच्छा र चाहनाअनुसार उनको भविष्यलाई हेरेर विवाह गरिदिएँ ।’

अमृत साउदी अरेबियाको एक कम्पनीमा कार्यरत रहेका गौतम परिवारले जनाएको छ ।

विवाहको लागि उनी केही समय अघि मात्रै घर आएका हुन् । उनी पहिलो श्रीमतीसँग सम्बन्ध विच्छेद गरेर बसेका बताइएको छ । धनाको विवाहमा माइतीलाई झापामा खबर गरे पनि उनीहरू भने सहभागी बनेका थिएनन् ।

'तिम्रो माइती घर पनि यही हो । घर पनि यही हो । मेरा छोरी छैनन् । तिमीलाई मैले सधैं छोरी सम्झिने छु । चाडपर्वमा यही घरलाई माइती सम्झिएर आउनू', धनालाई अन्माउँदै लक्ष्मीधरले भने ।

उनले हाम्रो घरको ढोका तिमीलाई सधैं खुला रहनेछ भन्दै गर्दा धेरैका आँखा रसाएका थिए । लक्ष्मीधरका अन्य दुई छोराहरू छन् । उनीहरू दुवै जनाको विवाह हुन बाँकी छ ।​

धनाले सैनामैना क्षेत्रमा केवल नेटवर्कमा काम गर्दै आएकी छिन्। अमृतसँग उनको केही समय अघिदेखि चिनजान भएको थियो ।

अमृत र धनाको दुवैको खुसीको लागि यो विवाह जुरेको हो ।