नेपाल प्रहरीको केन्द्रिय अनुसन्धान ब्युरो (सीआईबी)का तत्कालीन प्रमुख किरण बज्राचार्यसहित चारजना प्रहरी अधिकृतलाई विभागीय कारबाही गर्ने विषयमा गृह मन्त्रालयले उपसमिति गठन गरेको छ । 

गृहका सूचना अधिकारी एवं उपसचिव एकदेव अधिकारीका अनुसार आइतवार गृहका कानून महाशाखाका सहसचिव भरतमणि रिजालको संयोजकत्वमा तीन सदस्‍यीय उपसमिति गठन भएको हो ।

नेपाल प्रहरीका केन्द्रीय प्रवक्ता डीआईजी भीमप्रसाद ढकाल र मन्त्रालयको प्रहरी कर्मचारी प्रशासन उपशाखाका उपसचिव रामबहादुर शाही सदस्य छन् ।

‘आयोगले सिफारिस गरेको विभागीय कारबाहीमा ती चार प्रहरी अधिकृतमध्ये क–कसलाई कुन किसिमको विभागीय कारबाही गर्ने भन्ने सिफारिश गर्न उक्त उपसमिति गठन भएको हो,’ गृहका सूचना अधिकारी अधिकारीले लोकान्तरसँग भने,’ आयोग कार्यान्वयन गर्ने सरकारको निर्णय पछि उक्त प्रशासनिक कार्यका लागि उपसमिति गठन भएको हो ।’

उच्च अदालतका पूर्वन्यायाधीश डिल्लीराज आचार्यको नेतृत्वमा गठित जाँचबुझ आयोगले तत्कालीन सीआईबी प्रमुख एआईजी किरण बज्राचार्य, एसपी सञ्जयसिंह थापा, डीएसपीद्वय दुर्गा दाहाल र रुगम कुँवरले अनुसन्धानमा लापरबाही गरेको भन्दै कारबाही सिफारिस गरेको थियो ।

तत्कालीन सीआईबी प्रमुख बज्राचार्यसहित ४ जनालाई सुन तस्करीका दोषीलाई उन्मुक्ति दिएकोलगायत आरोप लागेको छ ।