संसदमा रामहरि खतिवडाले भने– मन्त्रीज्यू, तपाईंको पद ससुरालीबाट दाइजो ल्याएको होइन !

बजेटमा मन्त्रीहरूले मनोमानी गरेको भन्दै नेपाली कांग्रेसका केन्द्रीय सदस्य रामहरि खतिवडाले आपत्ति जनाएका छन् । बजेट बनाउँदा सरकार उत्पत्ति हुने थलो संसद्लाई नै बाइपास गरिएको आरोप उनले लगाए । 

प्रतिनिधि सभामा आइतबार विनियोजन विधेयकमाथि खर्च कटौती प्रस्ताव पेश गर्दै खतिवडाले बजेट निर्माणमा मन्त्रीहरूले सत्ता/प्रतिपक्ष भनेर विभेद गरेको आरोप लगाएका हुन् । 

‘प्रधानमन्त्री र मन्त्रीहरू जहिले पनि सत्ता जोगाउने काम गरिरहेका छन् । नजिकका नाता र दातालाई रिझाउने काम भएको छ । संसद्का कर्मचारीहरू कालोपट्टी बाँधेर काम गरिरहेका छन्,’ खतिवडाले भने, ‘मन्त्रीज्यूहरू, तपाईंहरूको ससुरालीबाट दाइजो ल्याएको पद होइन, यही संसद्बाट निर्वाचित भएको हो, संसद्लाई छल्ने काम नगर्नुस् ।’  

सांसद खतिवडाले पार्टीको झण्डा नबोक्ने कर्मचारीलाई मन्त्रालयमा विभेद गरिएको बताए । 

‘सक्षम कर्मचारीलाई अवसर दिइएको छैन । असक्षम कर्मचारीलाई प्रधानमन्त्री कार्यालयमा लैजाने गरिएको छ,’ उनले भने ।