काठमाडौं, २१ फागुन– नेपाली कांग्रेस संसदीय दलको नेता चयनका लागि मतदान जारी छ । नेता चयनका लागि अहिले संसदीय दलको कार्यालय सिंहदरबारमा मतदान भइरहेको छ ।

१० बजेबाट शुरु भएको मतदान दिउँसो १ बजेसम्म चल्ने निर्वाचन समितिले जनाएको छ । त्यसलगत्तै मतगणना गर्ने कार्यक्रम तय भएको छ ।

संसदीय दलको नेतामा सभापति शेरबहादुर देउवा र पूर्वमहामन्त्री प्रकाशमान सिंहबीच प्रतिस्पर्धा छ । संसदीय दलका नेताका लागि देउवा र सिंहले हिजो उम्मेदवारी मनोनयन दर्ता गराएका थिए ।

प्रत्यक्षतर्फ २३ र समानुपातिकतर्फ ४० गरी कांग्रेस संसदीय दलमा कूल ६३ जना सांसद छन् । संसदीय दलको नेतामा निर्वाचित हुन कम्तिमा ३२ मत ल्याउनुपर्ने छ ।