कावासोती, १६ फागुन - निर्वाचन आयोगका प्रमुख निर्वाचन आयुक्त अयोधीप्रसाद यादवले आवधिक निर्वाचनले लोकतन्त्रलाई सुदृढ बनाउने बताउनुभएको छ ।
नेपाल जेसिजले आज यहाँ आयोजना गरेको लोम÷लोन लिडर्स कार्यक्रमको उद्घाटन सत्रलाई सम्बोधन गर्दै उहाँले भन्नुभयो – “विधिको शासन कायम गर्न प्रयास गर्नपरेको छ । अहिले संविधान भए पनि विधिको शासनको अभाव छ ।”
परिवर्तनको आधारशिला युवा नै भएकाले युवाले मतदानलाई आफ्नो अधिकारका रुपमा ग्रहण गर्नुपर्ने प्रमुख आयुक्त यादवको भनाइ थियो ।
“मतदान च्वाइस होइन, ड्युटीका रुपमा बुझ्नुहोस्, यसले नै विधिको शासनलाई सहयोग पुग्छ,” उहाँले भन्नुभयो – “दलको अगुवा युवा नै हो । द्वैध चरित्र देखाउन छोड्नुपर्छ ।”
वैशाख ३१ गते हुने स्थानीय तहको निर्वाचनमा मतदाता शिक्षाका लागि राजनीतिक दलका भ्रातृ संस्था आवद्ध युवालाई जानकारी गराउने काम भइरहेको पनि उहाँले बताउनुभयो ।
निर्वाचन मेनेफेस्टो (घोषणा पत्र) का आधारमा हुन छाडी मनीफेस्टो (पैसा)का आधारमा हुने प्रवृत्ति हावी भएकाले यसको अन्त्यका लागि युवाले सक्रियता देखाउनुपर्ने उहाँको भनाइ थियो ।
कार्यक्रममा देशभरका जेसिज आवद्ध करिब पाँच सयजना पदाधिकारीको सहभागिता रहेको छ । रासस
