लिगलिगकोट (गोरखा), २७ चैत– आगामी वैशाख ३१ गते हुने स्थानीय तहको चुनावको सरगर्मी गोरखा जिल्लामा पनि बढेको छ । दुई नगरपालिका र नौ गाउँपालिका गरी ११ वटा स्थानीय तह रहेको गोरखामा खासगरी प्रमुख दलहरू नेपाली कांग्रेस, नेकपा एमाले र नेकपा माओवादी केन्द्रबीच नै प्रतिस्पर्धा हुने देखिएको छ ।

यसअघि २०६४ साल चैतमा सम्पन्न संविधानसभाको पहिलो निर्वाचनमा गोरखाका तीनवटै निर्वाचन क्षेत्रमा तत्कालीन नेकपा माओवादीले जीत हासिल गरेको थियो । यस्तै २०७० मंसिरमा सम्पन्न दोस्रो संविधानसभा निर्वाचनमा पनि ती सबै क्षेत्रमा माओवादी उम्मेदवार नै विजयी भएका थिए ।

पूर्व माओवादी नेता तथा नयाँ शक्ति नेपालका संयोजक डा. बाबुराम भट्टराईको बलियो पकड रहेको मानिने गोरखामा यसपटकको चुनावमा भने उनलाई आफ्नै अस्तित्व जोगाउन हम्मे पर्ने देखिन्छ ।

२०६४ सालमा सम्पन्न संविधानसभाको चुनावमा डा. भट्टराईले ‘सबैभन्दा बढी मतअन्तरले विजयी हुने उम्मेदवार’को रेकर्ड बनाएका थिए । गोरखा क्षेत्र नम्बर २ बाट चुनाव लडेका भट्टराईले त्यतिबेला ४२ हजार २ सय ६४ मत प्राप्त गरेका थिए भने उनका प्रतिस्पर्धी नेपाली कांग्रेसका चन्द्र प्रसाद न्यौपानेले ६ हजार ६ सय ७६ मात्रै प्राप्त गर्न सके ।

२०७० मंसिरमा सम्पन्न संविधानसभाको दोस्रो निर्वाचनमा डा. भट्टराई निर्वाचन क्षेत्र परिवर्तन गरेर २ बाट १ मा सरेका थिए । २०७० मा भट्टराईले २२ हजार ८ सय २४ मत प्राप्त गरेका थिए भने उनका प्रतिद्वन्द्वी नेपाली कांग्रेसका किरणबाबु श्रेष्ठले ८ हजार ९ सय ७१ मत प्राप्त गरेका थिए ।

यसपटक कांग्रेस, एमालेलाई फाइदा

पछिल्ला दुईवटा निर्वाचनमा गोरखाका तीनवटै निर्वाचन क्षेत्रबाट माओवादीले जीत हासिल गरेको थियो । २०७० को चुनावमा क्षेत्र नम्बर ३ बाट उठेका कांग्रेसका उम्मेदवार हरिबहादुर घलेले १० हजार ३ सय ४२ मत ल्याउनुबाहेक अन्य उम्मेदवारले माओवादीका उम्मेदवारभन्दा आधा कम मत पनि प्राप्त गर्न सकेका थिएनन्् ।

तर यसपटकको निर्वाचनमा माओवादीका लागि पहिलेको जस्तो अवस्था छैन । खासगरी पार्टीमा आएको विभाजन र बाबुराम भट्टराईले समेत आफ्नै संयोजकत्वमा नयाँ शक्ति नेपाल पार्टी स्थापना गरेपछि गोरखामा माओवादीको जनाधार कमजोर भइसकेको छ ।

माओवादीका उम्मेदवारहरू जीतपछि गाउँ नफर्किएको भन्दै स्थानीयहरू रुष्ट छन् । भूकम्प गएपछि राहत वितरण र उद्धारमा समेत माओवादीले नसघाएको स्थानीयको गुनासो छ । सत्तामा हुँदा समेत आफूहरूका लागि केही नगरेको भन्ने अर्को आरोप पनि स्थानीयले माओवादीलाई लगाउने गर्छन् ।

बरू पछिल्लो समय नेपाली कांग्रेस र नेकपा एमालेले संगठन विस्तारमा जोड दिएका थिए । विगतमा ‘लालकिल्ला’ नै ठानिने गोरखामा पछिल्लो समय कांग्रेस र एमालेले आफ्नो उपस्थिति बलियो बनाउने भरमग्दुर चेष्टा गरेका छन् । जसका कारण पनि उनिहरूले आफ्नो जनाधार थप बलियो बनाउँदै गएका स्थानियको ठहर छ । यस क्षेत्रका स्थानीयका अनुसार जिल्लाका दुईवटै नगरपालिका (पालुङटार र गोरखा)मा कांग्रेस र एमालेबीच नै प्रतिस्पर्धा हुने देखिन्छ ।

साबिकको सातवटा गाविसलाई गाभेर बनाइएको पालुङटार नगरपालिकाको मेयरका लागि नेपाली कांग्रेसका तर्फबाट नारायण गुरुङ र दीपक कँडेल, एमालेका तर्फबाट प्रकाश न्यौपाने, नेकपा माओवादी केन्द्रबाट गुणराज देवकोटा र नयाँ शक्ति नेपालबाट उमाकान्त देवकोटाको चर्चा छ ।

पालुङटार नगरपालिकामा हाल १० वटा वडा कायम गरिएको छ ।

आफ्नै क्षेत्रमा कमजोर बाबुराम !

बाबुराम भट्टराई प्रधानमन्त्री भएका बेला प्रायः महिनाको एकचोटि गोरखा पुग्ने गर्थे । तर अहिले उनको त्यस्तो रुटिन छैन । पहिले भट्टराई जिल्ला पुगेको खबर सुन्दा उनका कुरा सुन्न गाउँगाउँबाट मासिनहरू उनी भएको ठाउँ पुग्थे । तर अहिले गोरखामा बाबुरामप्रतिको त्यो ‘क्रेज’ भेटिँदैन ।

‘माओवादी पार्टी छाडेपछि बाबुरामप्रतिको आकर्षण घटिसकेको छ,’ पालुङटार बजारमा भेटिएकी एक महिलाले भनिन्, ‘प्रधानमन्त्री भएका बेला उनले जिल्लाका लागि केही गर्न सकेनन् ।’

---

---