राष्ट्रिय सभा सदस्यका लागि प्रदेश नम्बर २ मा उम्मेदवारी दिन पुगेका नेपाल संघीय समाजवादी पार्टीका उम्मेदवार यत्तिकै फर्किएका छन् ।

निर्वाचन आयोगले उम्मेदवारी मनोनयन दर्ताका लागि आइतवार १० देखि ३ बजेसम्मको समय छुट्ट्याएकोमा २५ मिनेट ढिला गरी पुगेपछि उम्मेदवारी दर्ता गराउन नपाएका हुन् ।

उक्त पार्टीका तर्फबाट मोहम्मद अख्तर हुसेन उम्मेदवारीका लागि जनकपुरस्थित निर्वाचन अधिकृतको कार्यालयमा पुगेका थिए ।

तोकिएको समयभन्दा ढिला गरी आएपछि मनोनयन दर्ता नगरिएको सहायक निर्वाचन अधिकृत पुष्पा झाले बताइन् ।

प्रदेश २ को प्रदेश सभामा उक्त पार्टीकी सावित्रीदेवी साह सांसद छिन् । केही स्थानीय तहमा पनि उक्त पार्टीले जित हात पारेको थियो ।