मिर्चैयामा वृक्षारोपण गर्दै प्रचण्डले भने- चुरे संरक्षणका लागि अलग्गै ऐन आवश्यक छ

प्रधानमन्त्री पुष्पकमल दाहाल ‘प्रचण्ड’ले सिरहाको मिर्चैया–७ मा वृक्षारोपण गरेका छन् । दशौँ चुरे संरक्षण दिवसका अवसरमा आज राष्ट्रपति चुरे–तराई मधेश संरक्षण विकास समिति, नेपाली सेना र वन तथा वातावरण सुरक्षा निर्देशनालयद्वारा आयोजित  कार्यक्रममा उनले वृक्षारोपण गरेका हुन् । 

वृक्षारोपणपछि प्रधानमन्त्री ‘प्रचण्ड’ले चुरे क्षेत्रको संरक्षणमा सङ्घीय, प्रादेशिक, स्थानीय सरकार, स्थानीय समुदाय, सरोकारवाला निकायको समन्वय, सहकार्य र संयुक्त प्रयास अपरिहार्य रहने बताए । 

तराई मधेशका बहुसङ्ख्यक जनताको जीवनरेखासँग जोडिएको चुरे क्षेत्र बहुपक्षीय र बहुसरोकारको विषय भएको उनले बताए । 

'चुरे क्षेत्रको संरक्षणमा सङ्घीय, प्रादेशिक, स्थानीय सरकार, स्थानीय समुदाय र सरोकारवाला निकायको समन्वय, सहकार्य र संयुक्त प्रयास अपरिहार्य छ,' उनले भने, 'तराई मधेशका बहुसङ्ख्यक जनताको जीवनरेखासँग जोडिएको चुरे क्षेत्र बहुपक्षीय र बहुसरोकारको विषय हो ।' 

चुरे संरक्षणका लागि अलग्गै ऐनको आवश्यकता देखिएकाले सरकारले आवश्यक समन्वय गरिरहेको उनले जानकारी दिए ।