माओवादी समाप्त हुने अन्तिम तगारोमा छ, बजेट ३२ सांसदका लागि मात्र हो– अमरेशकुमार सिंह

स्वतन्त्र सांसद डा. अमरेशकुमार सिंहले माओवादी पार्टी समाप्त हुने अन्तिम तगारोमा रहेको टिप्पणी गरेका छन् । बजेट माओवादीका सांसदका लागि मात्र लक्षित गरेर आएको आरोप उनले लगाए । 

विनियोजन विधेयकमाथि आइतबार प्रतिनिधिसभा बैठकमा खर्च कटौती प्रस्ताव पेश गर्ने क्रममा सांसद सिंहले बजेट माओवादीले जित्ने ठाउँमा मात्र खन्याउने काम गरिएको आरोप लगाएका हुन् । 

‘यो बजेट केही व्यापारीले बनाएको हो, अर्थमन्त्रीको इन्ट्रेस्टमा । यो बजेट केबल माओवादीका ३२ सांसदका लागि हो । २७५ जना सांसदको भनेर सोच्नु दिवासपना हो,’ सांसद सिंहल भने, ‘किनकि माओवादी पार्टी समाप्त हुने अन्तिम तगारोमा छ । आफ्नो सांसद भएको ठाउँ र जित्न सक्ने ठाउँमा मात्र बजेट खन्याइएको छ । हामीजस्ता निर्दा सांसदकोमा बजेट छैन ।’ 

बजेटले मन्दीमा रहेको अर्थतन्त्र उकास्ने काम नगरेको आरोप उनले लगाए ।

‘५ जना व्यापारीले लबिङ गर्‍यो भने करका दर घटाउने र बढाउने काम भएको छ, यस्तो पनि राजनीति हुन्छ ?’ उनले आक्रोश पोखे । 

जेठ १५ गते अर्थमन्त्री वर्षमान पुनले पेस गरेको बजेटअन्तर्गत विभिन्न मन्त्रालयका लागि विनियोजित शीर्षकमाथि संसद्मा छलफल चलिरहेको छ ।