राष्ट्रपतिसँगको भेटमा प्रचण्ड–नेपालले भने : प्रधानमन्त्रीको राजीनामा हाम्रो बटमलाइन !

नेपाल कम्युनिस्ट पार्टी (नेकपा)का अध्यक्ष पुष्पकमल दाहाल ‘प्रचण्ड’, वरिष्ठ नेता माधवकुमार नेपाल र झलनाथ खनालले प्रधानमन्त्रीबाट केपी शर्मा ओलीको राजीनामा आफूहरूको न्युनतम माग (बटमलाइन) भएको बताएका छन् । 

राष्ट्रपति विद्या भण्डारीसँग आइतवार राष्ट्रपति कार्यालय शीतल निवासमा भएको भेटवार्तामा प्रचण्डलगातका नेताहरूले प्रधानमन्त्रीबाट ओलीको राजीनामा आफूहरूको बटमलाइन भएको बताएका हुन् । 


Advertisement

‘हाम्रो बटमलाइन प्रधानमन्त्रीबाट ओलीले राजीनामा दिनु नै हो,’ तीनै नेताले राष्ट्रपतिलाई भनेको स्रोतले जानकारी दियो ।

राष्ट्रपति भण्डारीले जनताको भावनाअनुसार मिलेर अगाडि बढ्न नेताहरूसँग आग्रह गरेकी थिइन् । 


Advertisement

‘यस्तो संकटको बेला प्रधानमन्त्रीको राजीनामालाई जिद्दी नगर्नुस्, प्रधानमन्त्रीबाट राजीनामा तत्काल सम्भव छैन, तपाईंहरूले अध्यक्ष लिनुस्,’ राष्ट्रपति भण्डारीको भनाइ उद्धृत गर्दै स्रोतले लोकान्तरसँग भन्यो । 

ओलीले अध्यक्ष छाड्ने राष्ट्रपति भण्डारीको प्रस्तावमा नेताहरू सहमत नभएपछि नेकपाभित्रको विवाद तत्कालै हल हुने सम्भावना न्यून भएर गएको विश्लेषण गरिएको छ । 

‘पार्टी पनि नफुट्ने र राजीनामा पनि गर्नु नपर्ने गरी या तपाईंहरू विकल्प खोज्नुस् या सरकारको विकल्प स्वीकार्न तयार रहनुस्,’ राष्ट्रपतिको भनाइ उद्धृत गर्दै स्रोतले भन्यो । 

भेटमा प्रचण्ड, खनाल र नेपालले राष्ट्रपतिविरुद्ध महाअभियोग लगाउने हल्ला निराधार रहेको भन्दै त्यस्तो अफवाहको विश्वास नगर्न राष्ट्रपति भण्डारीसँग आग्रह गरेका थिए । 

राष्ट्रपतिविरुद्ध आफूहरूले षड्यन्त्र गरेको भन्ने प्रधानमन्त्री ओलीको आरोपपछि प्रचण्ड, नेपाल र खनालले राष्ट्रपतिसँग भेट्न समय लिएका थिए । 

प्रधानमन्त्री केपी शर्मा ओलीले शनिवार बालुवाटारमा मन्त्री र राज्यमन्त्रीहरूसँगको भेटमा राष्ट्रपतिविरुद्ध षड्यन्त्र भइरहेको बताएका थिए । 

राष्ट्रपतिसँगको भेटपछि ओलीसँग वार्ता गर्न प्रचण्ड बालुवाटार पुगेका छन् ।

लोकान्तर संवाददाता
लोकान्तर संवाददाता

लेखकबाट थप...

कमेन्ट गर्नुहोस्