विश्व स्वास्थ्य संगठन (डब्लुएचओ)ले कोरोनाभाइरस (कोभिड- १९)को जोखिम कायमै रहेकाले भौतिक दूरी अनिवार्य कायम गर्न अपिल गरेको छ ।

डब्लुएचओका नेपाल प्रतिनिधि जोस भ्यान्डेलरले मास्क लगाउने, नियमित हात धुने तथा भौतिक दूरी कायम गरेमा कोरोनाबाट धेरै हदसम्म बच्न सकिने उल्लेख गरेका छन् ।

'हाम्रो भौतिक दूरी संक्रमण रोक्ने एक अचुक उपाय हो । मास्कको प्रयोग अर्को सरल उपाय हो । संक्रमितको सम्पर्कमा आएको खण्डमा यसले केही हदसम्म रोक्न मद्दत गर्दछ, अर्को सरल उपाय हात धुनु हो,' उनले भनेका छन्, 'कम्तिमा १ मिटरको दूरी कायम गर्न सक्यौं भने मात्र पनि जोगिन सकिन्छ ।'

सबैले पर्याप्त सावधानी अपनाउने हो भने संक्रमित हुनुपर्ने तथा पुन: लकडाउन गर्नुपर्ने अवस्था नआउने उनको सुझाव छ ।