तपाईं अफिसमा रहँदा कतिपटक शौचालय जानुहुन्छ ? सोच्नुस् त धेरै शौचालय गएको भन्दै शौचालय जाने समय सिमित गरिदिएमा तपाईं के गर्नुहुन्छ ? 

चीनको एक कम्पनीले आफ्ना कर्मचारीहरूलाई कार्यालय समयमा दिनको एक पटकमात्र शौचालय जान दिने गरेको खुलासा भएको छ । 

दिनको एक पटकभन्दा बढी शौचालय गएमा जरिवाना तिर्नुपर्ने बताइएको छ ।  

दक्षिण चीनमा रहेको अम्पू इलेक्ट्रोनिक्स साइन्स एन्ड टेक्नोलोजी कम्पनीले दिनमा एक पटकमात्रै शौचालय जाने नीति बनाएको छ र सोही अनुसार कार्यान्वयन पनि । 

रिपोर्टका अनुसार, एक पटकभन्दा बढी शौचालय गएमा २० यूआन जरिवाना लगाइनेछ । उसले शौचालयमा धेरै समय बिताउन पनि पाउनेछैन ।

गत डिसेम्वर २० र २१ तारिखका दिन मात्रै कम्पनीले ७ कर्मचारीहरूमाथि कारबाही गरेको बताइएको छ । 

त्यहाँको स्थानीय प्रशासनले यस घटनाबारे अनुसन्धान शुरू गरेको बताइएको छ ।

अनुसन्धानका क्रममा कर्मचारीहरूको कार्यकुशलताका निम्ति यस्तो नियम लगाइएको कम्पनी सञ्चालकले बताएका छन् ।