प्रधानमन्त्री केपी शर्मा ओलीले प्रतिनिधिसभा पुनः विघटन हुनसक्ने संकेत गरेका छन् । शनिबारको विशेष अन्तरवार्ताका क्रममा बाहिर फेरि प्रतिनिधिसभा विघटन र अर्ली इलेक्सनमा देश जान्छ भन्ने बाहिर चर्चा छ , जनताले कसरी बुझ्दा ठीक होला ? भन्ने लोकान्तरका प्रधान सम्पादक विमल गौतमको प्रश्नमा ओलीले भने, ‘प्रतिनिधिसभा विघटन मेरो शोख होइन । मैलै पहिले पनि भनेँ मेरो बाध्यताले विघटन गरेको थिएँ । अब पनि मेरो कुनै शोख छैन । यदि संविधानले धकेलेर त्यहीँ पुर्यो भने म गरौं के ? संविधानले मलाई एउटा स्मुथ बाटो जे दिएको थियो त्यो संवैधानिक इजलाशले त्यो कुरालाई त्यसै रुपमा ग्रहण गरेन ।’

‘अब संविधानले अर्को प्रक्रियाबाट पनि त्यही पुर्यायो भने तपाईँ गर्नुहुन्छ के त ?’, ओलीले थपे, ‘संविधानको धारा ७६ को ५ आज आएर खोज्ने होइन । संविधानको धारा ७६ को ५ को, ३ को कार्यान्वयन आज आएर खोज्ने होइन । यदि कसैको बहुमत छ भने बहुमतको सरकार बन्छ  । चुनावपछिको तुरुन्त कुरा हो यो । चुनापछि यदि बहुमत छ भने बहुमतको सरकार बन्छ, छैन भने २ वा २ भन्दा बढी दलको मिलीजुली सरकार बन्छ, त्यसले विश्वासको मत प्राप्त गर्न सकेन भने प्रमुख पार्टीको बन्छ । प्रमुख पार्टीले विश्वासको मत प्राप्त गर्न सकेन भने र सरकार बन्नै सकेन भने निर्वाचनमा जान्छ ।’