काबुल विमानस्थलमा सोमवार कैयौं रकेट प्रहार गरिएको खबर छ । 

अमेरिकाले अफगानिस्तानबाट आफ्ना सबै सैनिक हटाउनका लागि ४८ घन्टाभन्दा कम समय बाँकी रहेको बेलामा यो आक्रमण गरिएको हो । 

प्रत्यक्षदर्शीहरूका अनुसार, ती रकेटहरू एउटा कारबाट प्रहार गरिएका थिए र विमानस्थललाई तारो बनाउने तिनीहरूको लक्ष्य थियो । 

विमानस्थल नजिकैको टोल सलिम कारवानमा एउटा रकेट खसेको बताइएको छ । 

आक्रमणको जिम्मेवारी कसैले लिएको छैन । 

अमेरिकाले सोमवार बिहानै पाँचवटा रकेटलाई बीचैमा ध्वस्त पारेको बताएको छ । 

केही स्थानीयहरूले आफ्नो घरमा रकेटका छर्रा खसेको बताए । 

यस्तो आक्रमणको घटना भए पनि काबुल विमानस्थलमा अमेरिकाका सबै कारवाहीहरू सञ्चालन भइरहेको ह्वाइट हाउसले एक बयान जारी गरेर बतायो । 

रकेट प्रहार गरिएपछि काबुलको उत्तरी भागमा भवनहरूमाथि धूवाँ उडेको देखिएको छ । विस्फोटपछि गोली चलेको आवाज पनि सुनिएको थियो । 

अमेरिकी सेनाले जवाफी कारवाहीमा गरेको प्रहारका कारण एउटा गाडीमा आगो लागेको तस्वीर सामाजिक सञ्जालमा देखिएको छ । 

अमेरिकी कारवाहीमा परी निर्दोष सर्वसाधारणको ज्यान गएको दाबी गरिएको छ । 

अमेरिकाका राष्ट्रपति जो बाइडनले आगामी २४ देखि ३६ घन्टामा आक्रमण हुन सक्ने चेतावनी दिएका थिए । उनले भने अनुसार नै आक्रमण भएको छ । 

बाइडनले अमेरिकी सैनिक फिर्ता लैजानका लागि मंगलवारसम्मको म्याद लिएका छन् ।