नेकपा एमालेका नेता सुवास नेम्वाङले शेरबहादुर देउवा नेतृत्वको सरकारलाई समय नपुगी अप्ठ्यारो अवस्थामा जन्मेको बच्चा जस्तो भएको टिप्पणी गरेका छन् । 

एमालेको भातृ संगठन युवा संघले काठमाडौंको राष्ट्रिय सभागृहमा आयोजना गरेको कार्यक्रममा नेम्वाङले भने, ‘गाउँघरमा सात महिना नपुगी बच्चा जन्मियो भने अप्ठ्यारो अवस्थामा जन्मियो भने यसको लक्षण त ठीक छैन भनिन्छ । सिन्को पनि भाँच्न नसक्ने अवस्थाको सरकार छ ।’

विज्ञहरूको लागि पनि उदेकलाग्दो सर्वोच्च अदालतको फैसलाबाट बनेको सरकार भएका कारण अहिलेसम्म मन्त्रिपरिषद् विस्तार हुन नसकेको उनले बताए ।

‘परमादेश सरकार भएको हो कि के हो ५० दिन भइसक्यो मन्त्रिपरिषद् विस्तार हुन सकेको छैन । कहीँ पनि सरकार विस्तारको नाम निशाना छैन । सरकार विस्तार गर्दा यो सरकार नै ढल्ने हो कि दल फुट्ने हो कि भन्ने अचम्मको अवस्थामा यो सरकार चलिरहेको छ,’ नेम्वाङले भने । 

यो सरकार जनताले नबनाएको उनी बताउँछन् ।

‘जनताले बनाएको सरकार होइन । जननिर्वाचित केपी ओलीको सरकारलाई विभिन्न कारणले विस्थापन गरेर अदालतको परमादेशले जन्माएको सरकार भएर होला सिन्को पनि भाँच्न सकेको छैन ।’

सर्वोच्च अदालतले विज्ञहरूका लागि पनि उदेकलाग्दो फैसला गरेको उनले बताए । ‘सर्वोच्च अदालतको फैसला विज्ञहरूको लागि पनि उदेकलाग्दो छ । कांग्रेस र माओवादीका सांसदलाई ह्वीप लाग्ने र अरू दलका सांसदलाई ह्वीप नलाग्ने फैसला गर्‍यो । केपी ओली फेरि सरकारमा आउँछन् कि भनेर गौडा छेक्ने गरी फैसला गरेको छ ।’

सर्वोच्च अदालतको फैसलाले शेरबहादुर देउवाको सरकारलाई आवश्यक पर्‍यो भने सय जनासम्मको सरकार बनाउने अधिकार दिएको भए हुने भन्दै व्यङ्ग्य गरेका थिए ।  

‘शेरबहादुर देउवाको सरकार त चानचुने सरकार हो र ? यो सरकारले ताल पर्‍यो भने ७० जना, ८० जना र आवश्यक पर्दा सय जनासम्मको मन्त्रिपरिषद् बनाउन पाउने अधिकार अदालत दिएको भए हुन्थ्यो ।’ 

मनमोहन अधिकारी नेतृत्वको सरकारको बेलामा अदालतले गरेको फैसलाले प्रधानमन्त्रीय प्रणालीलाई अप्ठ्यारो पारेको र त्यो बुझ्न पाँच वर्ष समय लागेको नेम्वाङले बताएका थिए ।