मान्छेका थरिथरि रहर हुन्छन् । तर अमेरिकाको मेक्सिको शहरमा बस्ने ३७ वर्षीया एक महिलाको अनौठो रहरले बच्चाको संख्या धेरै भएको छ ।

द सन यूकेमा प्रकाशित रिपोर्टअनुसार ३७ वर्षीया कोर्टनीलाई गर्भवती भइरहने रहर छ । सुत्केरी व्यथाको चिन्ताका बाबजुद कोर्टनी गर्भवती हुने रहरलाई बिर्सिन सक्दिनन् ।

कोर्टनीले भनिन्, ‘म गर्भवती हुँदा रमाइलो महसूस गर्छु । मलाई कमजोरी महसूस हुँदैन । मलाई धेरै दुखाइ पनि हुँदैन ।’

मान्छेअनुसार फरक–फरक अनुभूति हुने बताउँदै उनले भनिन्, ‘मेरो शरीर गर्भावस्थाका लागि राम्रो छ । यदि यस्तो हुँदैन्थ्यो भने हामीसँग यतिधेरै बच्चा हुने थिएनन् ।’

गर्भवति भइरहने रहरले धेरै बच्चा हुँदा परिवारमा समस्या पनि देखिएका छन् ।

कोर्टनीले भनिन्, ‘हामीसँग १५ यात्री बस्न मिल्ने भ्यान छ । अब हामीले यात्रामा जाँदा धेरै भीड हुन्छ । यात्राका क्रममा अर्कै गाडी चाहिन्छ । पछिल्लोपल्ट यात्रामा जाँदा हामीले घर नै भाडामा लिएका थियौं । होटलमा बस्नुपर्दा हामीले धेरै कोठा लिनुपर्थ्यो । ७ बेडरुम र ४ बाथरुम भएको घर साँघुरो भइसक्यो ।’

पत्नी कोर्टनी र पति क्रिस रोजर्स जस्तै सबै ११ बच्चाको नाम ‘सी’ अक्षरबाट राखिएको छ । गर्भमा रहेको बच्चाको नाम पनि सी अक्षरबाटै राख्ने तयारी रहेको कोर्टनीले बताइन् ।

हालसम्म कोर्टनीका ६ छोरा र ५ छोरी गरी ११ बच्चा छन् । अबको बच्चा छोरी होस् भन्ने चाहन्छिन् कोर्टनी । अब छोरी भएमा उनको परिवारमा ६ छोरा र ६ छोरी हुनेछन् ।