आज मिति २०७८ साल मंसिर महिनाको ७ गते मंगलबार । बितेको २४ घण्टामा भएका घटनाक्रम र त्यससँग सम्बन्धित समाचारसहित हामी उपस्थित भएका छौँ ।

सर्वोच्च अदालतको इतिहासमा पहिलो पटक प्रधानन्यायाधीशको अधिकार कटौती हुनेगरी नियमावली संशोधन भएको छ । न्यायाधीशहरुले गोला तानेर मुद्दा हेर्नेगरी नियमावली संशोधन भएपछि अहिलेसम्म प्रधानन्यायाधीशले पेसी तोक्ने व्यवस्था परिवर्तन हुने छ । सर्वोच्च अदालतको इतिहासमा प्रधानन्यायाधीशले पेसी तोक्ने अधिकार खोसिएको उल्लेखनीय परिघटना हो ।

नियमावली संशोधन प्रस्ताव फुलकोर्टले पारित गरेपछि कानून मन्त्रालय हुँदै छपाइका लागि मुद्रण विभाग पुगेको थियो भने सोमबार नै मुद्रण विभागले राजपत्रमा छापेर बेवसाइटमा राखिसकेको छ ।
अब पुनः फुलकोर्ट बैठक बसेर गोला प्रथा लागू गर्ने मिति तय हुनेछ ।

त्यसपछि पेशी तोक्ने प्रधानन्यायाधीशको तजबिजी अधिकारलाई कटौती गर्दै न्यायाधीशहरूले आफैं मुद्दाको गोला तान्नेछन् ।
प्रधानन्यायाधीश चोलेन्द्र शमशेर जबरालाई गोला तान्न नदिने, उनले गोला तानेमा पनि उनीसँग बेञ्च शेयर नगर्नेमा न्यायाधीशहरू एकमत छन् ।

प्रधानन्यायाधीश जबरामाथि गम्भीर प्रश्नहरू उठेका कारण पदबाट राजीनामा दिनुपर्ने मागसहित नेपाल बार एसोसिएसन आन्दोलित छ ।
यसैबीच बारले प्रधानन्यायाधीशलाई महाभियोग लगाउन आग्रह गर्दै दलहरुलाई हारगुहार गर्न थालेको छ।  जसअनुसार  सोमबार बारले सभामुख अग्निप्रसाद सापकोटलाई भेट गरी संवैधानिक बाटोबाट समस्या समाधानका लागि दलहरूलाई ध्यानाकर्षण गराउन ज्ञापनपत्र बुझाएको छ ।

यस्तै, एमाले संसदीय दलका उपनेता सुवास नेम्वाङलाई जबरामाथि महाभियोग लगाउन र सर्वोच्चको सुदृढीकरणको आन्दोलनमा साथ दिन आग्रह गरेको गरेको छ । यस्तै बारले राष्ट्रिय सभा अध्यक्ष, माओवादी केन्द्र, जसपालगायतलाई पनि ज्ञापनपत्र बुझाएको छ । बारले प्रधानन्यायाधीश जबराको राजीनामा माग गर्दै करिब ४ सातायता लगातार आन्दोलन गर्दै आएको छ ।
००००
प्रधानमन्त्री तथा नेपाली काँग्रेसका सभापति शेरबहादुर देउवा महाधिवेशन प्रतिनिधिका लागि सर्वसम्मत चयन भएका छन् । उनी गृह जिल्ला डडेल्धुराबाट महाधिवेशन प्रतिनिधिमा सर्वसम्मत चयन भएको निर्वाचन अधिकृत लोकेन्द्रबहादुर बमले जानकारी दिए । सभापति देउवाले मञ्जुरीनामा मार्फत उम्मेदवारी दिएका थिए। यस्तै कांग्रेस नेतृ एवम प्रधानमन्त्री देउवा पत्नी डा। आरजु राणा पनि महाधिवेशन प्रतिनिधिमा सर्वसम्मत चयन भएकी छन् । सोमबार १२५ प्रतिनिधिसभा निर्वाचन क्षेत्रमा काँग्रेसको अधिवेशन प्रारम्भ भएको थियो ।
००००
कर्णाली प्रदेशका मुख्यमन्त्री जीवनबहादुर शाहीले सत्ता गठबन्धन दलकै सल्लाहमा मन्त्रिपरिषद् विस्तार हुने बताएका छन् । मुख्यमन्त्री शाहीले अहिले सबै दलका वडा, पालिका, जिल्ला र क्षेत्रीय प्रतिनिधिको निर्वाचनको चटारोले केही ढिलो भए पनि जतिसक्दो चाँडो मन्त्रिपरिषद् विस्तार गरिने बताए ।
००००
पछिल्लो २४ घन्टामा ३८५ जनामा कोरोना संक्रमण पुष्टि भएको छ । स्वास्थ्य तथा जनसंख्या मन्त्रालयका अनुसार १२ हजार ६९७ नमूना परीक्षणमध्ये ३६७ पीसीआर र १८ जनामा एन्टिजेन पोजिटिभ देखिएको हो ।
००००
एमाले स्थायी कमिटी बैठक मंगलबार बस्दैछ । सोमबार नै बस्ने भनिएको बैठक मंगलबार ११ बजेका लागि सारिएको छ । बैठकमा महाधिवेशन केन्द्रीत विषयमा छलफल हुनेछ । एमालेको महाधिवेशन मंसिर १०–१२ गते चितवनमा हुँदैछ ।
००००
राष्ट्रिय प्रजातन्त्र पार्टी (राप्रपा)को महाधिवेशन प्रतिनिधि निर्वाचन शुरू भएको छ । सोमबार देखि सुरु भएको निर्वाचनबाट महाधिवेशनका लागि देशका ३३० वटै प्रदेश सभा निर्वाचन क्षेत्रबाट दुई हजार ९७० प्रतिनिधि छनोट हुने पार्टीका प्रचार संयोजक मोहन श्रेष्ठले जानकारी दिए । राप्रपाको महाधिवेशन मंसिर १५–१७ काठमाडौंमा हुँदैछ । यसैबीच राप्रपाको अध्यक्षमा राजेन्द्र लिंदेनले उम्मेदवारी दिने भएका छन् ।
००००
नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले सोमबार चितवनमा ६ मन्त्रीलाई सहभागी गराएर विकास बहस गराएका छन् । ‘समृद्ध भरतपुरको लागि विकास बहस’ नामक कार्यक्रममा अर्थमन्त्री जनार्दन शर्मा, ऊर्जा, जलस्रोत तथा सिंचाइमन्त्री पम्फा भुषाल, पर्यटनमन्त्री प्रेम आले, मन्त्रिपरिषद् कार्यालयका राज्यमन्त्री उमेश श्रेष्ठ, बागमती प्रदेशका आर्थिक मामिलामन्त्री शालिकराम जम्कट्टेल र आन्तरिक मामिलामन्त्री कृष्ण खनाल सहभागी थिए । एमालेले चितवनमा महाधिवेशन गर्ने भएपछि प्रचण्डको पनि गृहजिल्लामा सक्रियता बढेको छ ।
००००

नेपाली काँग्रेसका उपसभापति विमलेन्द्र निधिले आफू सभापति हुनुपर्ने २३ वटा कारण सार्वजनिक गरेका छन् ।सभापतिका दाबेदार निधिले सामाजिक सञ्जालमार्फत आफू सभापतिमा हुनुपर्ने २३ कारण सार्वजनिक गरेका हुन् ।

००००
गैरआवासीय नेपाली संघ (एनआरएनए)को वर्तमान कार्यसमिति विघटन गरिएको छ । परराष्ट्र मन्त्रालयले एनआरएनएलाई एक पत्र पठाउँदै कुमार पन्त नेतृत्वको वर्तमान कमिटीलाई विघटन गरी निर्वाचन संरक्षक समितिलाई नयाँ निर्वाचन गराउन अधिकार प्रत्यायोजन गरेको हो । यससँगै एनआरएनएमा विवाद थप गहिरिएको छ । वर्तमान अध्यक्ष पन्तले सरकारविरुद्ध अदालत जाने बताएका छन् ।

००००
निर्वाचन आयोगले मंसिर १७ गतेदेखि मतदाता नामावली संकलन विशेष अभियान थाल्ने भएको छ । हिमाली र पहाडी जिल्लाका स्थानीय तहमा १० दिनसम्म र तराई, भित्री मधेस तथा काठमाडौं उपत्यकाका स्थानीय तहमा १५ दिनसम्म अभियान सञ्चालन हुने आयोगले जनाएको छ ।

००००
शहीद स्मारक ए डिभिजन लिगअन्तर्गत सोमबार भएका खेलमा विभागीय टोली त्रिभुवन आर्मी फुटबल क्लब र नेपाल पुलिस क्लबले १-१ को बराबरी खेल्दा साविक विजेता मछिन्द्रले न्युरोड टिम (एनआरटी)लाई २-१ ले पराजित गरेको छ ।