सभापतिको साझा उम्मेदवार छान्न कांग्रेस संस्थापनइतर पक्षको बैठक शुरू

शुक्रवार शुरू हुने पार्टीको १४ औं महाधिवेशनमा संस्थापनइतरबाट सभापतिको साझा उम्मेदवार तय गर्न नेपाली कांग्रेसका वरिष्ठ नेता रामचन्द्र पौडेल पक्षका नेताहरूको बैठक बसिरहेको छ ।

काठमाडौंको बत्तीसपुतलीस्थित अनुपम फूडल्यान्डमा पौडेल पक्षका केन्द्रीय सदस्य, जिल्ला सभापति र पूर्व जिल्ला सभापतिहरूको बैठक बसिरहेको हो । 

सोमवार नेता पौडेल र मंगलवार प्रकाशमान सिंहको निवासमा भएको बैठकमा साझा उम्मेदवारबारे सहमति जुट्न नसकेपछि बुधवार पुनः बैठक बसेको हो । 

हिजोको बैठकमा महामन्त्री शशांक कोइरालाले सभापतिको प्रतिस्पर्धाबाट आफू पछि हट्ने संकेत गरेका थिए । 

सभापतिका लागि मुख्य आकांक्षी डा. शेखर कोइराला र प्रकाशमान सिंहले दबी नछाडेपछि साझा उम्मेदवार तय गर्न बैठक बसेको हो । वरिष्ठ नेता पौडेलले बुधवार साँझसम्म आफूहरूले उम्मेदवार टुंग्याउने बताएका छन् । 

मंगलवारको बैठकमा नेता पौडेलले शेखर र प्रकाशमानबीच सहमति भए आफूले मान्ने बताएका थिए । बुधवारको बैठकमा सभापति बाहेक पदाधिकारीको प्यानल बनाउने विषयमा समेत छलफल हुँदैछ । 

संस्थापन इतरबाट सभापतिमा एकभन्दा बढी उम्मेदवार बनेपनि पदाधिकारी र केन्द्रीय समितिको लिष्ट भने साझा बनाउने सहमति भएको छ । 

नेपाली कांग्रेसको १४ औं महाधिवेशन मंसिर २४ देखि काठमाडौंमा शुरू हुँदैछ । नयाँ नेतृत्व चयनका लागि मंसिर २५ गते मनोनयन गर्ने कार्यक्रम छ । संस्थापन पक्षबाट पार्टी सभापति एवं प्रधानमन्त्री शेरबहादुर देउवा सभापतिको दाबेदार छन् । उपसभापति विमलेन्द्र निधिले पनि सभापतिमा उम्मेदवारी दिने घोषणा गरेका छन् । 

सभापति देउवा पक्षको बैठक पनि बुधवार बिहान बस्दैछ ।