नेकपा माओवादी केन्द्र १ नम्बर प्रदेशले झण्डै २ हप्ता बित्दा पनि पदाधिकारी टुंगो लगाउन सकेको छैन ।

प्रदेश समितिका ९ पदाधिकारीका लागि ४० जनाभन्दा बढी आकांक्षी देखिएपछि माओवादीमा नेतृत्व टुंग्याउन सकस परेको हो । 

पदाधिकारीमध्ये अध्यक्षमा मात्रै ७ जनाले दाबी पेश गरेका छन् । ३ जना उपाध्यक्षका लागि दर्जन बढी दाबी रहेको छ । १ जना सचिवका लागि आधा दर्जनको दाबी रहेको छ ।
 
प्रदेश समितिको दोस्रो बैठक बुधवार बस्दैछ । यसअघि बसेको पहिलो बैठकले पदाधिकारी चयनका लागि भन्दै ५ सदस्यीय कार्यदल गठन गरेको थियो । १ नम्बर प्रदेशका सहइन्चार्ज अजम्बर काङ्माङको संयोजकत्वमा केन्द्रीय सदस्यहरू सुरेशकुमार राई, इन्द्रबहादुर आङ्बो, हेमराज भण्डारी र रामकुमारी चौधरी छन् ।

कार्यदलले नेतृत्व छान्नका लागि सहमतिको अन्तिम प्रयास गरिरहेको कार्यदलका सदस्य हेमराज भण्डारीले बताए । कार्यदलले सहमति जुटाउन नसकेपछि १ नम्बर प्रदेशमा कार्यक्षेत्र भएका केन्द्रीय सदस्यको बैठक मंगलवार विराटनगरमा बसेको थियो । केन्द्रीय सदस्यको बैठकले पनि नेतृत्व छान्न सकेन । 

अध्यक्षमा दाबी गर्नेमा झापाका मणिकुमार साम्पाङ, सुनसरीका शिवकुमार डाँगी, मुक्साहाङ मेन्याङ्बो, पाँचथरका हर्कबहादुर नेम्वाङ र उदयपुरका मोहनकुमार खत्री लगायत रहेका छन् । 

महिला उपाध्यक्षमा संखुवासभाकी इन्दिरा मिश्र, झापाकी सरु न्यौपाने, मोरङकी विनिता घिमिरे, धनकुटाकी धनकुमारी विक लगायतले दाबी गरेका छन् । समावेशी उपाध्यक्षमा मोरङका भोगेन्द्र यादवले दाबी गरेका छन् । खुला उपाध्यक्षमा सुनसरीका भोला बस्नेतले दाबी गरेका छन् ।

सचिवमा मोरङका गणेश उप्रेती, झापाका सिपी कडरिया, सुनसरीका आइन्द्र विक्रम बेघा, धनकुटाका ऋषिराम ढुंगाना, ओखलढुंगाका मोहनकुमार खड्का लगायतले दाबी गरेका छन् ।

सहमति नभए दिउँसो २ बजेपछि मतदान प्रक्रियाबाट नेतृत्व छान्ने निर्वाचन समितिका संयोजक राजन किरातीले बताए । सहमति नभए बुधवारै चुनाव गरेर बुधवारै मतपरिणाम निकाल्ने गरी काम भइहरको उनले बताए । 

माओवादी १ नम्बर प्रदेशको पहिलो सम्मेलन गत मंसिर २५ गतेदेखि शुरू भएको थियो ।

सम्मेलनको तयारीका लागि केन्द्रका नेताहरूले काठमाडौं जान हतार गरेकाले चुनावबाट भए पनि पदाधिकारी टुंग्याउने तयारी भइरहेको निर्वाचन समितिका एक सदस्यले बताए । ती सदस्यका अनुसार केही नेताले महाधिवेशनपछि मात्रै नेतृत्व टुंग्याउनुपर्नेमा समेत जोड दिइरहेका छन् ।